दार्जिलिङ: दार्जिलिङका सांसद राजू विष्टले २० अगस्टका दिन मनाइने ‘नेपाली भाषा मान्यता दिवस’ को अवसरमा सम्पूर्ण नेपाली भाषाभाषी तथा भाषाप्रेमीहरूमा हार्दिक शुभकामना व्यक्त गरेका छन्।​नेपाली भाषालाई भारतीय संविधानको आठौँ अनुसूचीमा मान्यता दिलाउन लामो सङ्घर्ष गर्ने र प्राणको आहुति दिने सम्पूर्ण भाषा-सङ्ग्रामीहरूप्रति सम्मान व्यक्त गर्दै विष्टले आजको दिन उनीहरूको योगदानको स्मरण र कृतज्ञता प्रकट गर्ने विशेष अवसर भएको बताएका छन्।​सामाजिक सञ्जालमा सन्देश जारी गर्दै सांसद विष्टले भारतमा नेपाली भाषा-साहित्यको अध्ययन-अध्यापनको अवसर, व्यवस्था र यसका लागि उपलब्ध सुविधाहरूको अझ व्यापक स्तरमा प्रयोग तथा उपयोग गर्नुपर्ने आवश्यकतामा जोड दिएका छन्।​भाषा मान्यता दिवसको पालना गर्दै यस दिशातर्फ निरन्तर प्रयास गर्ने प्रतिज्ञा गर्न आह्वान गर्दै उनले सम्पूर्ण भाषा-योद्धाहरूप्रति शत-शत नमन व्यक्त गरेका छन्। साथै, उनले वर्तमान एवं भावी पिँढीलाई समृद्ध भाषा र साहित्यको प्रवर्द्धनमा लाग्न प्रेरणा र शुभकामना समेत दिएका छन्।