​हावडा: पूर्वी भारतमै पहिलो पटक रोबोटिक साइटोरिडक्टिभ सर्जरी (सीआरएस) र हाइपरथर्मिक इन्ट्रापेरिटोनियल किमोथेरापी (हाइपेक) को प्रयोग गरी जटिल चरणको ओभेरियन क्यान्सरको सफल उपचार गरिएको छ। हावडास्थित नारायण अस्पतालमा उपचार गराएकी ४२ वर्षीया महिलाले यो अत्याधुनिक प्रविधिबाट क्यान्सरलाई परास्त गरेकी हुन्।
​परम्परागत रूपमा पेट ठूलो चिरफार गरेर गरिने जटिल शल्यक्रियाको साटो साना छिद्र (किहोल) मार्फत रोबोटिक शल्यक्रिया गरिएकाले बिरामी शल्यक्रियाको ३ दिनमै डिस्चार्ज भएकी छन्। पेटमा अत्यधिक पानी जम्ने र दुवै अण्डाशयमा ट्युमर देखिएपछि अस्पताल पुगेकी ती बिरामीमा चौथो चरण नजिक (स्टेज ३ सी) पुगेको एडभान्स ओभेरियन क्यान्सर पुष्टि भएको थियो। सुरुमा उनको क्यान्सर मार्कर सीए १२५ को स्तर १,१५८ रहेकोमा शल्यक्रिया अघि दिइएको ३ साइकल किमोथेरापीपछि सो घटेर १०.३ मा झरेको थियो।
​ट्युमरको आकार ८ सेन्टिमिटरभन्दा सानो भएपछि बहुविषय विशेषज्ञ टोलीले ओपन सर्जरीको सट्टा रोबोटिक विधि रोजेका हुन्। करिब ५ घण्टा चलेको रोबोटिक शल्यक्रियामार्फत पेटभित्र देखिएका सम्पूर्ण ट्युमरहरू हटाइएको थियो। लगत्तै, नाङ्गो आँखाले नदेखिने सूक्ष्म क्यान्सर कोषहरू नष्ट गर्न ९० मिनेटसम्म ४२ डिग्री सेल्सियसमा तातो किमोथेरापी (सिस्प्लाटिन) पेटभित्र परिचालन गरियो।
​अस्पतालका गाइनेकोलोजिक ओन्कोलोजी प्रमुख डा. कौस्तव बासुका अनुसार प्रारम्भिक किमोथेरापीप्रतिको राम्रो प्रतिक्रिया र बिरामीको सबल स्वास्थ्यका कारण यो जटिल उपचार रोबोटिक प्रविधिबाट सम्भव भएको हो। यसले बिरामीलाई ठूलो घाउको पीडा र लामो अस्पताल बसाइबाट जोगाएको छ। हाल फलोअप किमोथेरापी पूरा गरी बिरामी सामान्य दिनचर्या र काममा फर्किसकेकी छन्।