​नयाँ दिल्ली: मुम्बई इन्डियन्सका कप्तान हार्दिक पाण्ड्या आफ्नो पुरानो टोली गुजरात टाइटन्समा फर्किने विषयमा भइरहेको छलफल कप्तानीको शर्तका कारण रद्द भएको छ। स्रोतका अनुसार गुजरात टाइटन्स उनलाई टोलीमा समावेश गर्न तयार थियो र वर्तमान कप्तान शुभमन गिलले पनि हार्दिकको फिर्तामा सहमति जनाएका थिए। तर, हार्दिकले पुनः कप्तानी पाउनुपर्ने शर्त राखेपछि व्यवस्थापनले त्यसलाई पूर्ण रूपमा अस्वीकार गरेको छ।
​गुजरात टाइटन्सका अधिकारीहरूले यस विषयमा कुनै टिप्पणी गर्न अस्वीकार गरेका छन्। अर्कोतर्फ, हार्दिकका प्रवक्ताले हार्दिकले कुनै पनि फ्रेन्चाइजसँग सिधा कुरा नगरेको र कुनै पहल भएको भए मुम्बई इन्डियन्सको स्तरमा मात्र भएको बताएका छन्।
​यसैबीच, अघिल्लो सिजनमा १४ मध्ये १० खेल हारेर ९औँ स्थानमा सीमित भएको मुम्बई इन्डियन्समा पनि हार्दिकको कप्तानीलाई लिएर असन्तोष बढेको छ।
टोलीको लगातारको खराब प्रदर्शनका कारण मुम्बई इन्डियन्स व्यवस्थापनले हार्दिकलाई कप्तानीबाट हटाउनेबारे विचार गरिरहेको बुझिएको छ।