१३ अगस्ट सुनुवाइ हुने

​कोलकाता: पश्चिम बङ्गालका मस्जिद तथा धार्मिक स्थलहरूबाट लाउडस्पीकर हटाइएको विषयलाई लिएर दायर गरिएको जनहित याचिका कलकत्ता उच्च अदालतले स्वीकार गरेको छ। कार्यवाहक मुख्य न्यायाधीश तापब्रत चक्रवर्ती र न्यायाधीश अतरूप बनर्जीको संयुक्त इजलासले उक्त याचिका स्वीकार गर्दै २८ साउन (१३ अगस्ट) का लागि सुनुवाइको मिति तोकेको छ।
​अधिवक्ता दानिश फारुकीद्वारा दायर गरिएको रिटमा राज्य सरकारको मौखिक निर्देशनका आधारमा राज्यभरका करिब ४,००० भन्दा बढी मस्जिदहरूबाट लाउडस्पीकर हटाइएको दाबी गर्दै त्यसलाई चुनौती दिइएको छ। तृणमूल सांसद तथा वरिष्ठ अधिवक्ता कल्याण बनर्जीका अनुसार अदालतले पूर्व आदेशमै तोकिएको डेसिबल सीमाभित्र रहेर अजानका लागि लाउडस्पीकर प्रयोग गर्न पाइने स्पष्ट पारेको थियो। यद्यपि, पुलिस र प्रशासनले धम्कीका आधारमा गैरकानुनी रूपमा लाउडस्पीकर उतारेको आरोप लगाउँदै निश्चित ध्वनि सीमाभित्र धार्मिक कार्य गर्न पाउनुपर्ने माग गरिएको छ।
​यसैबीच, प्रशासनिक कारबाहीको विरोधमा मंगलबार राजा बजारदेखि रानी रासमणी एभेन्युसम्म विरोध र्‍याली निकाल्न अनुमति माग्दै अब्दुल समद नामक व्यक्तिले पनि अदालतको ढोका ढक्ढक्याएका छन्।
​अर्कातिर, मुख्यमन्त्री शुभेन्दु अधिकारीले भने यो कारबाहीको बचाउ गर्दै सरकारले केवल अदालतकै आदेश पालना गराएको दाबी गर्नुभएको छ। उहाँका अनुसार राज्यभरबाट कुल ५,२९९ वटा लाउडस्पीकर हटाइएको छ, जसमा ४,२०३ मस्जिद र १,०९६ मन्दिरहरू समावेश छन्। प्रशासनले यो कारबाही शान्तिपूर्ण रूपमा सम्पन्न भएको बताए पनि विपक्षी दलहरूले भने यसलाई राजनीतिक प्रतिशोधको संज्ञा दिएका छन्।