कराची: पाकिस्तान क्रिकेट बोर्ड (पीसीबी)-ले टोलीको कोचिंग स्टाफमा फेरबदल गरेको छ। पीसीबी-ले दक्षिण अफ्रिकाका पूर्व प्रथम श्रेणी क्रिकेटर माइक स्मिथलाई टोलीको नयाँ ब्याटिंग प्रशिक्षक नियुक्त गरेको छ। स्मिथको कार्यकाल ईंग्ल्याण्ड यात्राबाट शुरु हुनेछ। पाकिस्तानको टोली गत केही समयदेखि ब्याटिंग विभागमा विभिन्न समस्याहरूसँग जुझिरहेको छ। त्यसैलाई ध्यानमा राखेर पीसीबी-ले स्मिथसँग अनुबन्ध गरेको छ। स्मिथ लेभल ४-का ब्याटिंग प्रशिक्षक हुन् अनि उनीसँग फ्रेञ्चाइजी आधारित टी२० लीगहरूमा विभिन्न टोलीहरूसँग काम गर्ने अनुभव रहेको छ। उनले पाकिस्तान सुपर लीग (पीएसएल)-मा पनि धेरै टोलीहरूसँग काम गरिसकेका छन्। पीसीबी-ले ब्याटिंग प्रशिक्षकको निम्ति विज्ञापन जारी गर्दा नै स्मिथले यस पदको निम्ति आवेदन गरेका थिए। अब स्मिथले पाकिस्तानको ईंग्ल्याण्ड यात्राको साथ आफ्नो कार्यकाल शुरु गर्नेछन्। पाकिस्तानले ईंग्ल्याण्डमा ३ वटा टेस्ट म्याचको शृंखला खेल्नेछ। पहिलो टेस्ट म्याच १९ अगस्तदेखि लीड्समा शुरु हुनेछ। यसरी दोस्रो टेस्ट २७ अगस्तदेखि ऐतिहासिक लर्डसको मैदानमा खेलिनेछ। शृंखलाको तेस्रो तथा अन्तिम टेस्ट म्याच ९ सेप्टेम्बरदेखि बर्मिंघमको एजबेस्टनमा खेलिनेछ। पाकिस्तानले अहिले वेष्ट इण्डिजविरुद्ध टेस्ट शृंखला खेलिरहेको छ। स्मिथले पाकिस्तानी टोलीमा ब्याटिंग प्रशिक्षकको रूपमा राष्ट्रिय चयनकर्ता असद शफीकको स्थान लिनेछन्, जसले अन्तरिम रूपमा यस जिम्मेवारीलाई निर्वाह गरिरहेका छन्।