ग्लास्गो: राष्ट्रमण्डल खेलहरूमा दोस्रोपल्ट स्वर्ण पदक जित्ने नीरज चोपड़ाको सपना पूरा हुन सकेन। शुक्रवार अबेर राति भएको पुरुष ज्याभलिन थ्रो स्पर्धाको फाइनलमा भारतका स्टार एथलीट नीरजले कठिन परिस्थितिहरूबीच आफ्नो सर्वश्रेष्ठ प्रदर्शन गर्न सकेनन् अनि रजत पदक हासिल गरे। यसरी सबैलाई चकित बनाउँदै भारतकै यशवीर सिंहले आफ्नो अन्तिम प्रयासमा सर्वश्रेष्ठ प्रयास गरी काँस्य पदक जिते। यसरी नीरज स्वर्ण जित्नदेखि चुके पनि ज्याभलिन थ्रो-मा भारतले जम्मा २ वटा पदक जित्यो। स्वर्ण पदक आशानुरुप श्रीलंकाका रुमेश थरंगा पथिरागेले जिते। टोक्यो ओलम्पिकमा स्वर्ण र पेरिस ओलम्पिकमा रजत पदक जित्ने २८ वर्षीय नीरजले आफ्नो दोस्रो प्रयासमा यस सत्रको आफ्नो सर्वश्रेष्ठ प्रदर्शन गर्दै ८५.८३ मीटरको थ्रो गरे, जुन रजत पदकको निम्ति पर्याप्त थियो। नीरजले आफ्नो पहिलो प्रयासमा ८०.९७ मीटर, तेस्रो प्रयासमा ८१.२९ मीटर र चौथो प्रयासमा ८०.७३ मीटरको थ्रो गरे। यसअघि उनी १९ जूनमा जोहा डायमण्ड लीगमा ८५.६९ मीटरको थ्रो गरी चौथो स्थानमा रहेका थिए। स्पर्धाको फाइनलमा नीरजको साथमा यशवीर सिंह र रोहित यादव पनि ओर्लिएका थिए। यी दुईजनामा २४ वर्षीय यशवीरले आफ्नो छैटौं तथा अन्तिम प्रयासमा ८३.७२ मीटरको थ्रो गरी सबैलाई चकित पारे। उनी पाँचौं थ्रो-सम्म ८१.३३ मीटरको सर्वश्रेष्ठ प्रयासको साथ सातौं स्थानमा थिए तर अन्तिम प्रयासको साथ उनी सीधै तेस्रो स्थानमा पुगे अनि काँस्य पदक जिते। रोहित यादव ८१.५६ मीटरको सर्वश्रेष्ठ प्रयासको साथ समग्रमा सातौं स्थानमा रहे। श्रीलंकाका उदीयमान खेलाड़ी रुमेश थरंगा पथिरागेले आशानुरुप प्रदर्शन गर्दै ८९.७५ मीटरको सर्वश्रेष्ठ प्रयासको साथ स्वर्ण पदक हासिल गरे। चिसो मौसमबीच पनि उनले असाधारण प्रदर्शन गरे। उनले जूनमा रोम डायमण्ड लीगमा ९२.६२ मीटरको थ्रो गरेका थिए। यसबीच पाकिस्तानका गत च्याम्पियन तथा वर्तमान ओलम्पिक च्याम्पियन अरशद नदीम चाहिँ तेस्रो प्रयासपछि नै पदकको दौड़बाट बाहिर भए। उनको सर्वश्रेष्ठ थ्रो ७७.४१ मीटरको रह्यो। वर्तमान विश्व च्याम्पियन त्रिनिदाद एण्ड टोबेगोका केशोर्न वालकट छैटौं स्थानमा रहे।