याद छ पासा?

एकदिन उनले आफ्नो रगतले

यो भूमी चिल्लो परेर लिपेको

अब त सुकिसक्यो त्यो भूमि

तर  मेटिएनन् तातो रगतका डामहरू।

                   याद छ पासा?

‘आमा म जाँदै छु‘  अन्तिम शब्द 

तर कहाँ?उसलाई नै थाहा थिएन

ऊ गयो एउटा लामो यात्रामा

फेरी कहिल्यै नफर्कने गरी 

                                  याद छ पासा?

पुछिएपछि सिउँदो अनि फुटेपछि चुरा

भर्खरै बोली फुटेको छोराको दुधिले मुखले

‘बाबा काहा जानुभ?’ भन्ने प्रश्न सुन्दा

मुटुमा बज्रपात कस्तो परेको थियो

                                याद छ पासा?

सेतो कात्रो रातो भएको देख्दा 

मुटु फुटेर आँखाबाट वर्षात झरेको बेला

मुटुकै टुक्रालाई काँधमा बोकी आफैले

पोल्न परेको बाउको विडम्बना कस्तो होला

                                याद छ पासा?