खरसाङ: भाजपा खरसाङको एक टोलीले खरसाङ महकुमा अधिकारीको कार्यालय तथा खरसाङ खाद्य अनि वितरण विभागको कार्यालय पुगेर राशन कार्डसम्बन्धी मानिसहरूको नाम किन कुनै पूर्व सूचना (नोटिफिकेशन) बिना हटाइएको भन्ने विषयमा जानकारी लिएको छ। यस अवसरमा भारतीय जनता पार्टीको तर्फबाट आरके शर्मा, पञ्चायत समिति सदस्या एंव मण्डल अध्यक्ष दिक्षा तामाङ, जिल्ला मिडिया प्रभारी चन्दन प्रसाद लगायत अन्यहरु उपस्थित रहेका थिए। यस विषयमा भाजपा खरसाङका कार्यकर्ता आरके शर्माका अनुसार सांसद राजु विष्ट र विधायक सोनाम लामाको पहल तथा तत्परतामा रासन कार्डबाट नाम हटाइएका व्यक्तिहरूको नाम पुनः रिस्टोर गरिएको छ। उनले रासन कार्डबाट नाम हटाइएका व्यक्तिहरूलाई यस विषयमा कुनै पनि अफवाहमा नपर्न आग्रह गरेका छन्। साथै, नाम हटाइएका व्यक्तिहरूले कुनै नयाँ फारम भर्न आवश्यक नरहेको र उनीहरूको नाम स्वतः पुनः रिस्टोर भइसकेको जानकारी खरसाङ फुड एण्ड सप्लाई कार्यालयका कन्ट्रोलरबाट प्राप्त भएको आरके शर्माले बताएका छन्।