​सिलगढी: हुलाक सेवालाई थप आधुनिक र सेवाग्राहीमैत्री बनाउने उद्देश्यले सिलिगुडी हुलाक कार्यालयमा अत्याधुनिक डिजिटल किओस्क मेसिन जडान गरिएको छ।
उत्तर बङ्गालमै पहिलो पटक भित्र्याइएको यो सेवाको सोमबार औपचारिक रूपमा उद्घाटन गरिएको हो।
​यसअघि चिठीपत्र, पार्सल र अन्य सामग्री पठाउन सेवाग्राहीहरू घण्टौंसम्म हुलाकको काउन्टरमा लाइन बस्नुपर्ने बाध्यता थियो। अब भने डिजिटल किओस्कको माध्यमबाट सेवाग्राही आफैँले बुकिङ प्रक्रिया पूरा गर्न सक्नेछन्।
​यो मेसिनमा सेवाग्राहीले पठाउनुपर्ने सामग्री राखेपछि यसले स्वतः त्यसको तौल लिनेछ। तौलका आधारमा तय हुने हुलाक शुल्क डिजिटल माध्यमबाट तत्कालै भुक्तानी गर्न सकिने व्यवस्था मिलाइएको छ।
​हुलाक सेवाका निर्देशक एम. सुधाकर माल्याले सर्वसाधारणको बहुमूल्य समय बचत गर्न तथा हुलाक सेवालाई सहज, छिटो र पारदर्शी बनाउन डिजिटल किओस्क सुरु गरिएको बताए।
​यो डिजिटल किओस्क सेवा हप्ताको सातै दिन बिहान ८ बजेदेखि बेलुका ८ बजेसम्म खुला रहनेछ, जसले गर्दा सेवाग्राहीले सो अवधिमा जुनसुकै बेला आफैँ सामग्रीहरू बुकिङ गर्न सक्नेछन्।
​नयाँ सेवा सुरु भएसँगै स्थानीयबासी निकै उत्साहित देखिएका छन्। लामो लाइन बस्नुपर्ने झन्झटबाट मुक्ति मिलेको र हुलाक बुकिङ निकै छिटो हुने भन्दै सेवाग्राहीहरूले यसको स्वागत गरेका छन्।