सिलगढी: सार्वजनिक जग्गा र मुख्य सडक किनारा मिचेर बनाइएका अवैध संरचनाहरू विरुद्ध सिलगढी नगर निगम (एसएमसी) ले आफ्नो कडा प्रशासनिक अभियानलाई निरन्तरता दिएको छ। यसै क्रममा नगर निगमको टोलीले सिलगढीको व्यस्त व्यावसायिक क्षेत्र एस.एफ. रोडस्थित ‘चौपाटी बाई अतरंगी’ आसपास निर्माण गरिएका अवैध भौतिक संरचनाहरूमाथि बुलडोजर चलाएर भत्काएको छ। सडक अतिक्रमण गरी व्यवसाय सञ्चालन गर्दा यातायात आवागमन र सहरको सौन्दर्यमा गम्भीर असर पुगेको भन्दै नगर निगमले यो कदम चालेको हो।​अतिक्रमण हटाउने कार्यलाई तीव्रता दिन र सम्भावित विवाद वा अवरोधलाई नियन्त्रण गर्न नगर निगमका माननीय कमिश्नर स्वयम् फिल्डमा उत्रिएका थिए। कमिश्नर र नगर निगमका उच्च पदस्थ अधिकारीहरूको प्रत्यक्ष उपस्थितिमा चलाइएको यस अभियानका क्रममा सुरक्षा व्यवस्था चुस्त बनाउन ठूलो संख्यामा प्रहरी र नगर प्रहरी बल परिचालन गरिएको थियो।

प्रशासनले कानुन विपरीत बनाइएका टहरा र संरचनाहरूलाई पूर्ण रूपमा हटाएर उक्त क्षेत्र खाली गराएको छ।​पछिल्लो केही समययता सिलीगुढी र आसपासका क्षेत्रमा सरकारी जग्गा, नदीका बाँध र सार्वजनिक सडक कब्जा गर्ने प्रवृत्ति विरुद्ध नगर निगम निकै आक्रामक रूपमा प्रस्तुत भइरहेको छ। ‘स्वच्छ र व्यवस्थित सिलीगुढी’ बनाउने उद्देश्यका साथ सुरु गरिएको यो अतिक्रमण विरोधी अभियान कुनै पनि राजनीतिक वा व्यावसायिक दबाबमा नरोकिने नगर निगमका अधिकारीहरूले स्पष्ट पारेका छन्। आगामी दिनमा सहरका अन्य व्यस्त र मिचिएका क्षेत्रहरूमा पनि यस्तै कारबाही जारी रहने निगम स्रोतले जनाएको छ।