​सोरेङ: पञ्जाबको जालन्धरमा हालै सम्पन्न पाँचौँ राष्ट्रिय यू–१५ सब-जुनियर ब्वाइज एन्ड गर्ल्स बक्सिङ च्याम्पियनसिपमा उत्कृष्ट प्रदर्शन गरी राज्यको नाम रोशन गर्ने खेलाडी र प्रशिक्षकहरूलाई सोरेङ जिल्ला प्रशासनले एक विशेष कार्यक्रमका बीच भव्य सम्मान गरेको छ। खेलकुदको क्षेत्रमा पुर्‍याएको अद्वितीय योगदान र उत्कृष्ट उपलब्धिको कदर गर्दै जिल्लाका उच्च अधिकारीहरूले उनीहरूलाई बधाई तथा शुभकामना व्यक्त गरेका हुन्।
​यस सम्मान समारोहमा पञ्जाबमा आयोजित उक्त राष्ट्रिय प्रतियोगिताको ३० देखि ३३ केजी तौल समूहमा कास्य पदक जित्न सफल खेलाडी सुश्री सोनिया सुब्बालाई विशेष रूपमा सम्मानित गरियो। उनीसँगै खेल्लो इन्डिया सेन्टर (केआईसी) सोरेङका प्रशिक्षक श्री सुमन लेप्चा, सोरेङ खेल्लो इन्डिया सेन्टरकी प्रशिक्षार्थी सुश्री अर्पना लेप्चा र सोरेङ सेन्टरकै पूर्व प्रशिक्षार्थी एवं हाल गान्तोकस्थित खेल्लो इन्डिया स्टेट सेन्टर अफ एक्सीलेन्स (केआईएससीई) मा आबद्ध सुश्री दिपु भगतलाई पनि खेल क्षेत्रमा पुर्‍याएको योगदानका लागि सम्मान गरिएको थियो।
​उक्त गरिमामय सम्मान समारोहमा जिल्ला अध्यक्ष सुश्री तिलादेवी गुरुङ, सोरेङ नगर पञ्चायतका सदस्यहरू, सोरेङका जिल्लापाल श्री धीरज सुवेदी, अतिरिक्त जिल्लापाल श्री डीआर विष्ट, अतिरिक्त जिल्लापाल (विकास) श्री ओङ्दी शेर्पा र एसडीएम (मुख्यालय) श्री प्रेम के सुब्बाको उपस्थिति रहेको थियो। यसका साथै सोरेङ जिल्ला बक्सिङ संघका अध्यक्ष श्री लोब्जाङ लामा, खेलकुद तथा युवा मामिला विभागकी उप-निर्देशक सुश्री ममिता गुरुङ, विभिन्न सरकारी विभागका प्रमुखहरू, अधिकारीहरू तथा ठूलो संख्यामा विद्यार्थीहरूको उपस्थिति रहेको यस कार्यक्रमले स्थानीय युवा खेलाडीहरूलाई आगामी दिनमा अझ बढी मिहिनेत गर्न थप ऊर्जा र प्रेरणा मिल्ने विश्वास गरिएको छ।