नयाँ दिल्ली: विश्वको तेस्रो सबैभन्दा पुरानो तथा एशियाको सबैभन्दा पुरानो फूटबल टुर्नामेण्ट डूरण्ड कपको १३५औं संस्करणको कार्यक्रम घोषित गरियो। यसपाली २४ वटा टीमले ५ वटा आयोजक शहर कलकत्ता, राँची, इम्फाल, शिलंग र गुवाहाटीमा खिताबको निम्ति चुनौती पेश गर्नेछ। टुर्नामेण्टको शुरुवात २५ जुलाई र फाइनल २३ अगस्तमा कलकत्तामा हुनेछ। उद्घाटन म्याच र फाइनल दुवै विवेकानन्द युवा भारती क्रीड़ांगण (सल्ट लेक स्टेडियम) मा खेलिनेछ। डूरण्ड कपको आयोजन समितिले बुधवार टुर्नामेण्टमा हिस्सा लिने सबै टीमहरू र आयोजक शहरहरूको कार्यक्रमको घोषणा गऱ्यो। यसपाली पनि टुर्नामेण्टमा इण्डियन सुपर लीग (आईएसएल), आई-लीग, सर्विसेज टीमहरू र विदेशी सैन्य टीमहरूको भागीदारी देख्न पाइनेछ। यस संस्करणमा ७ वटा टीमले पहिलोपल्ट डूरण्ड कपमा हिस्सा लिनेछ। यसमा श्रीलंका सशस्त्र बलहरूको डिफेन्स एफसी, मेघालय प्रीमियर लीग च्याम्पियन नोंगकेस स्पोर्ट्स, सोशल एण्ड कल्चरल क्लब, बागपत एफसी, समलेश्वरी स्पोर्टिंग, एफसी रेंगदाई र मुम्बे एफसी सामेल छन्। साल २०१९-देखि डूरण्ड कपको प्रमुख आयोजक रहने कलकत्ता यसपाली पनि टुर्नामेण्टको केन्द्र हुनेछ। शहरमा दुईवटा ग्रुप चरणको म्याचहरू बाहेक उद्घाटन म्याच, दुईवटा क्वार्टर फाइनल, एउटा सेमिफाइनल र फाइनल खेलिनेछ। सबै म्याचहरू विवेकानन्द युवा भारती क्रीड़ांगण र किशोर भारती क्रीड़ांगणमा खेलिनेछ। यसबाहेक इम्फाल, शिलंग, गुवाहाटी र राँचीमा पनि म्याचहरू खेलिनेछ।