मुख्यमन्त्री खाण्डुद्वारा उद्घाटन

​ईटानगर: लामो समयदेखि पर्यावरणका लागि ठुलो चुनौती बनिरहेको प्लास्टिक फोहोरको समस्यालाई वैज्ञानिक रूपमा समाधान गर्न अरुणाचल प्रदेश सरकारले एक महत्त्वपूर्ण कदम चालेको छ।
मुख्यमन्त्री पेमा खाण्डुले सामाजिक सञ्जाल फेसबुक मार्फत जानकारी दिँदै राज्यको तवाङ जिल्ला अन्तर्गत जाङ सब-डिभिजनको ल्ह क्षेत्रमा ५० लाख रुपैयाँको लगानीमा निर्मित ‘बृहत् फोहोर विसर्जन तथा प्लास्टिक फोहोर व्यवस्थापन र रिसाइक्लिङ आयोजना’ को सुरुवात भएको घोषणा गर्नुभएको छ। प्रधानमन्त्री खनिज क्षेत्र कल्याण योजना (पीएमकेकेकेवाई) अन्तर्गत विकसित गरिएको यो आयोजनाले हिमाली क्षेत्रमा पर्यावरण संरक्षण र वैज्ञानिक फोहोर व्यवस्थापनका लागि आवश्यक पूर्वाधार प्रदान गर्नेछ।

​यस महत्त्वाकाङ्क्षी परियोजनाको केन्द्रविन्दुमा एउटा अत्याधुनिक ‘मटेरियल रिकभरी फेसिलिटी’ (एमआरएफ) रहेको छ, जसले प्लास्टिक र अन्य फोहोरहरूलाई वैज्ञानिक ढङ्गले सङ्कलन, वर्गीकरण, पुनरुत्थान र पुन: प्रयोग (रिसाइकल) गर्ने कार्यलाई प्रभावकारी रूपमा अगाडि बढाउनेछ। जलस्रोत विभागद्वारा सफलतापूर्वक कार्यान्वयन गरिएको यस परियोजनाको सञ्चालन र रेखदेख स्थानीय ‘हिमालयन इन्डिजिनियस युथ अर्गनाइजेसन’ ले गर्नेछ।
मुख्यमन्त्री खाण्डुले यो आयोजनाले तवाङ क्षेत्रमा प्लास्टिक प्रदूषण कम गर्न र प्रधानमन्त्री नरेन्द्र मोदीको ‘स्वच्छ भारत अभियान’ को सपनालाई साकार पार्न ठुलो भूमिका खेल्ने विश्वास व्यक्त गर्नुभएको छ।