सिक्किमवासीको सादगी र पर्यावरण प्रेम अनुकरणीय

​गान्तोक: सिक्किमका राज्यपाल ओम प्रकाश माथुरले ५ माइल, तादोङस्थित श्री श्री सरस्वती डोल्मा मन्दिरमा नवनिर्मित द्वादश ज्योतिर्लिंग र भगवान शिवको मूर्तिको अनावरण गर्नुभएको छ।
तादोङको ५ माइलमा अवस्थित मन्दिर परिसरमा शुक्रबार आयोजित एक विशेष आध्यात्मिक समारोहमा मुख्य अतिथिका रूपमा सहभागी हुँदै उहाँले वैदिक अनुष्ठानका साथ मूर्तिहरूको प्राण प्रतिष्ठा गर्नुभएको हो।
​धार्मिक तथा सांस्कृतिक दृष्टिले महत्त्वपूर्ण मानिएको उक्त समारोहमा सिक्किमका स्वास्थ्य तथा परिवार कल्याण मन्त्री एवं स्थानीय विधायक जीटी ढुङ्गेल, मन्दिर व्यवस्थापन समितिका प्रतिनिधि, विभिन्न सरकारी विभागका उच्च अधिकारी तथा स्थानीय श्रद्धालुहरूको बाक्लो उपस्थिति थियो।
​सामाजिक कार्यकर्ता सम्मानित
समारोहका अवसरमा राज्यपाल माथुरले मन्दिर निर्माण, विकास र सेवा कार्यमा निस्वार्थ रूपमा योगदान पुर्‍याउने स्थानीय सक्रिय सामाजिक कार्यकर्ता तथा भक्तजनहरूलाई सम्मान गर्नुभएको थियो। सम्मान कार्यक्रमपश्चात् राज्यपालले भक्तजनहरूसँगै होम-हवनमा भाग लिई सिक्किमवासीको सुख-समृद्धि, साम्प्रदायिक सौहार्द र उत्तम स्वास्थ्यको कामना गर्नुभयो।
​धार्मिक स्थल एकताका आधारशिला: राज्यपाल
उपस्थित जनसमुदायलाई सम्बोधन गर्दै राज्यपाल माथुरले सरस्वती डोल्मा मन्दिर जस्ता धार्मिक संस्थाहरू सांस्कृतिक पहिचान र सामुदायिक एकताका आधारशिला भएको बताउनुभयो।
“सम्मानित हुनुभएका सामाजिक कार्यकर्ताहरूको योगदानले हाम्रो विरासतलाई भावी पुस्ताका लागि जीवन्त राख्न मद्दत पुग्नेछ,” उहाँले भन्नुभयो।

​भगवान शिवलाई कल्याणका देवताका रूपमा स्मरण गर्दै उहाँले पवित्र मन्दिरमा भोलेनाथको प्राण प्रतिष्ठाको हिस्सा बन्न पाउनु आफ्नो लागि सौभाग्यको क्षण भएको उल्लेख गर्नुभयो।
सिक्किमका नागरिकहरूको प्रशंसा गर्दै राज्यपाल माथुरले भन्नुभयो, “यहाँका बासिन्दाहरूको सादगी, गहिरो सांस्कृतिक निष्ठा, आपसी मेलमिलाप र पर्यावरणप्रतिको सजगता वास्तवमै अनुकरणीय छ।” उहाँले भगवान शिवले सिक्किमका हरेक घरपरिवारलाई सुख, शान्ति र समृद्धिको आशीर्वाद दिने विश्वास समेत व्यक्त गर्नुभयो।