​गान्तोक: सिक्किम खेलकुद विकास बोर्ड का अध्यक्ष श्री रिन्जिङ वाङ्गेल छोपेलले सोरेङ-चाखुङ निर्वाचन क्षेत्रका माननीय विधायक श्री आदित्य गोले ज्यूसँग एक शिष्टाचार भेटघाट गर्नुभएको छ। यस महत्वपूर्ण भेटघाटमा उहाँहरूसँगै सिक्किम ओलम्पिक एसोसिएसनका अध्यक्ष श्री सी. जाङ्पो, गान्तोक नगर निगम (जीएमसी) का कमिश्नर श्री ग्यारी छोपेल र सिक्किम एमेच्योर स्विमिङ एसोसिएसनका अध्यक्षको पनि विशेष उपस्थिति रहेको थियो। भेटघाटका क्रममा राज्यमा खेलकुदको विकास, सुदृढीकरण र आगामी दिनहरूमा सुरु हुन गइरहेका विभिन्न नयाँ खेलकुद परियोजनाहरूका सम्बन्धमा उहाँहरूबीच निकै गहिरो र फलदायी छलफल भएको छ। युवा खेलाडीहरूलाई नयाँ अवसर प्रदान गर्ने र खेलकुद पूर्वाधारलाई अझ सुदृढ बनाउने उद्देश्यका साथ आयोजना गरिएको यस बैठकले आगामी दिनमा सिक्किमको खेलकुद क्षेत्रलाई नयाँ उचाइमा पुर्‍याउने विश्वास लिइएको छ।