नयाँ दिल्ली: शक्तिशाली स्पेनविरुद्ध फिफा वर्ल्ड कप २०२६-को म्याचमा उत्कृष्ट प्रदर्शन गर्ने केप भर्डेका गोलकीपर भोजिन्हा रातारात नायक बन्न पुगेका छन्। चरम दबाबको म्याचमा केप भर्डेको पोस्टमा भित्ता बनेर उभिने यस गोलकीपरको सोशल मीडियामा फलोअर्स १० घण्टामै ५० हजारबाट बढ़ेर ५० लाखभन्दा अधिक पुगेको छ। सोमवार अबेर राति खेलिएको म्याचमा साल २०१० को विश्व विजेता स्पेनलाई गोलरहित ड्रमा रोक्न ४० वर्षीय भोजिन्हाले उत्कृष्ट प्रदर्शन गरेका थिए। म्याचभरि स्पेनले लगातार आक्रमण गरे पनि उनले एकपछि अर्को उत्कृष्ट शेभ गरेका थिए। केप भर्डे जस्तो सानो अफ्रिकी देशको लागि स्पेनसँग बराबरीको नतीजा पनि ऐतिहासिक उपलब्धि मानिएको छ। भोजिन्हाले आशानुरुप प्लेयर अफ द म्याच-को पुरस्कार जिते। पुरस्कार हासिल गरेपछि उनले भने, यो पुरस्कार मेरा सबै साथी खेलाड़ीहरूका लागि हो। म निरन्तर मेहनत गरिरहनेछु। उत्कृष्ट प्रदर्शनका कारण उनले फूटबलप्रेमीहरूबाट समर्थन र प्रशंसा पाइरहेका छन्। म्याचपछि उनको इन्स्टाग्राम फलोअर्स ह्वात्तै बढ़ेको छ। म्याचअघि भोजिन्हाको इन्स्टाग्राममा ५० हजारभन्दा कम फलोअर्स थिए। म्याचपछि उनका फलोअर्स ५० लाखभन्दा अधिक पुगिसकेका छन्। स्पेनको तूफानलाई शान्त गर्ने यस गोलकीपरको उत्कृष्ट प्रदर्शनको अहिले सर्वत्र प्रशंसा भइरहेको छ। भोजिन्हाको पूरा नाम जोसिमार जोसे एभोरा डियास हो। फूटबल मैदानमा उनले भोजिन्हाको नामले ख्याति अर्जन गरेका छन्। उनको जन्म केप भर्डेको मिण्डेलोमा भएको थियो। भोजिन्हाले २५ वर्षको उमेरमा मात्र पेशादार फुटबल खेल्न शुरु गरेका थिए, जुन उमेरमा साधारणत फूटबलरहरू स्थापित भइसकेका हुन्छन्। उनले आफ्नो करियरमा केप भर्डे, माल्डोभा, रोमानिया, साइप्रस र पोर्तुगलका तल्लो डीभिजनका क्लबहरूबाट पेशादार फूटबल खेलेका थिए। वर्तमानमा उनी पोर्तुगलको क्लब चाभेसमा रहेका छन्। उनले २०१२-मा राष्ट्रिय टीमबाट पदार्पण गरेका हुन् र अहिलेसम्म राष्ट्रिय टीमको निम्ति ९० वटा म्याच खेलिसकेका छन्।
लगभग ५.३ लाख जनसंख्या भएको अफ्रिकी देश केप भर्डेले आफ्नो लड़ाकू प्रदर्शनद्वारा सबैको मन जित्यो। फिफा ऱ्याङकिंगमा ६४औं स्थानमा रहने अनि पहिलोपल्ट वर्ल्ड कपमा खेल्दै यस देशले पहिलो म्याचमै यूरोपेली च्याम्पियन तथा विश्व ऱ्याङकिंगमा तेस्रो नम्बरमा रहने स्पेनिश टीमलाई स्तब्ध बनायो। म्याचमा केप भर्डेको टीमले असाधारण अनुशासन, मजबूत डिफेन्स र अद्भूत संयमको प्रदर्शन गऱ्यो। गोलकीपर भोजिन्हा, सेण्टर ब्याक पिको लोपेस र पूरा टीमले स्पेनको लगातार हमलाहरूलाई असफल बनाएर इतिहासमा एउटा नयाँ अध्याय लेख्यो। चाखलाग्दो कुरा के छ भने भोजिन्हा ४० वर्षका हुन् जबकि स्पेन यस वर्ल्ड कपको सबैभन्दा युवा टीमहरूमा एक हो। केप भर्डेका प्रशिक्षक बुबिस्ताले म्याच अघि भनेका थिए, हाम्रो देश र टीमलाई पूरा विश्वले चिनोस् भन्ने म चाहन्छु। हामी यहाँ आफ्नो छाप छोड़न आएका हौं। अन्तमा गएर टीमले आफ्नो प्रदर्शनद्वारा प्रशिक्षकको बयानलाई सही साबित गऱ्यो।