​नयाँ दिल्ली: ​अमेरिकी व्यवसायी एलोन मस्कले धनको मामिलामा एउटा नयाँ इतिहास रचेका छन्। स्पेसएक्सको आइपिओ पछि उनको कुल सम्पत्ति बढेर झण्डै १.१ ट्रिलियन डलर पुगेको छ र उनी विश्वकै पहिलो ‘ट्रिलेनियर’ (खर्बपति) बनेका छन्। यसअघि फोर्ब्सले उनको सम्पत्ति करिब ७८० अरब डलर आँकलन गरेको थियो।
​मस्कको सम्पत्तिको सबैभन्दा ठूलो हिस्सा उनको कम्पनी स्पेसएक्सको शेयरबाट आउँछ, जसको अनुमानित मूल्य करिब ८६६ अरब डलर बताइएको छ। यसबाहेक ‘टेस्ला’, ‘एक्स’, ‘न्यूरालिङ्क| र ‘द बोरिङ कम्पनी’ मा पनि उनको ठूलो हिस्सेदारी रहेको छ।
​एआई र रोबोटको युगमा पैसाको महत्त्व घट्न सक्छ: मस्क
​यति ठूलो सम्पत्ति कमाए पनि मस्क भने भविष्यमा पैसाको महत्त्व कम हुन सक्ने विश्वास गर्छन्। सन् २०२६ को ‘एबन्डेन्स समिट’ मा बोल्दै उनले आगामी समयमा आर्टिफिसियल इन्टेलिजेन्स(एआई) र रोबोटहरू मानिसका आवश्यकताहरू पूरा गर्न पूर्ण रूपमा सक्षम हुने दाबी गरे।
​मस्कका अनुसार एआई र रोबोटको बढ्दो क्षमताले उत्पादन यसरी बढाउनेछ कि धेरैजसो चिजहरू सजिलै र सस्तोमा उपलब्ध हुनेछन्। उनले भविष्यमा “युनिभर्सल हाई इन्कम” जस्तो स्थिति बन्न सक्ने बताए, जहाँ मानिसका लागि परम्परागत जागिर र आम्दानीको परिभाषा नै बदलिनेछ।
​काम गर्नु बाध्यता होइन, विकल्प बन्नेछ
​उनले भविष्यमा काम गर्नु मानिसको बाध्यता नभएर एउटा विकल्प मात्र बन्न सक्ने पनि उल्लेख गरे। मस्कको कम्पनी टेस्लाले अहिले ‘अप्टिमस’ नामक ह्युमनोइड (मानव स्वरूपको) रोबोटमा काम गरिरहेको छ र कम्पनीको लक्ष्य सन् २०३० सम्ममा १० लाख रोबोटहरू परिचालन गर्ने रहेको छ।
​विश्वकै पहिलो ट्रिलेनियर बने पनि मस्कको ध्यान अहिले पैसाभन्दा बढी अन्तरिक्ष, एआई र रोबोटिक्स जस्ता क्षेत्रमा केन्द्रित छ, जसलाई उनी मानव सभ्यताको भविष्यका लागि सबैभन्दा महत्त्वपूर्ण मान्छन्।