​कालिम्पोङ: दार्जिलिङका सांसद एवं भारतीय जनता पार्टी (भाजपा) का नेता राजु बिष्टको अध्यक्षतामा कालिम्पोङ विधानसभा क्षेत्रको विशेष सङ्गठनात्मक बैठक सम्पन्न भएको छ। बैठकमा कालिम्पोङका विधायक (एमएलए) भरत क्षेत्री, जिल्लास्तरीय भाजपा नेता, कार्यसमिति पदाधिकारीका साथै पञ्चायत समिति र पञ्चायत सदस्यहरूको व्यापक उपस्थिति रहेको थियो।
​बैठकका क्रममा कालिम्पोङ क्षेत्रमा पञ्चायत स्तरको शासन व्यवस्थालाई कसरी सुदृढ र प्रभावकारी बनाउने भन्ने विषयमा गहन छलफल भएको छ। पञ्चायत बलियो भए मात्रै आम नागरिकले सरकारी सेवा, सुविधाहरू र सामाजिक कल्याणकारी योजनाहरू सहजै पाउन सक्ने निष्कर्ष बैठकले निकालेको छ। मुख्यमन्त्री सुवेन्दु अधिकारीको नेतृत्वमा भाजपा सरकार राज्यमा पञ्चायत स्तरको सुशासन स्थापित गर्न र तल्लो तहसम्म लोकतन्त्रलाई बलियो बनाउन पूर्ण रूपमा प्रतिबद्ध रहेको सांसद बिष्टले स्पष्ट पारेका छन्।
​सांसद बिष्टले गाउँ-गाउँको विकासका लागि सम्पूर्ण पञ्चायत सदस्यहरूलाई स्थानीय विधायक, पार्टी नेतृत्व र प्रशासनिक निकायसँग समन्वय गरेर काम गर्न निर्देशन दिएका छन्। प्रत्येक गाउँमा खानेपानी, स्वास्थ्य सेवा, शिक्षा, आवास, ग्रामीण सडक र सरसफाइको अवस्थामा सुधार ल्याउन युद्धस्तरमा काम गर्नुपर्नेमा उनले जोड दिएका छन्। सरकारी कल्याणकारी योजनाहरू समाजका अन्तिम व्यक्तिसम्म पुर्‍याउन र विशेष गरी किसान, महिला, युवा तथा आदिवासी समुदायको उत्थानका लागि नियमित रूपमा ‘ग्राम सभा’ आयोजना गरी पारदर्शिता कायम गरिने बिष्टले बताएका छन्।
​प्रधानमन्त्री नरेन्द्र मोदी र मुख्यमन्त्री सुवेन्दु अधिकारीको दूरदर्शी नेतृत्वमा केन्द्र र राज्य दुवै सरकारले पिछडिएका क्षेत्रहरूको विकासलाई प्राथमिकतामा राखेको चर्चा गर्दै सांसद बिष्टले आगामी पाँच वर्षभित्र कालिम्पोङ, दार्जिलिङ पहाड, तराई र डुअर्स क्षेत्रका प्रत्येक गाउँको मुहार फेर्न दोब्बर मिहिनेतका साथ काम गरिने प्रतिबद्धता व्यक्त गरेका छन्।