गान्ताेक: ​सिटिजन एक्सन पार्टी (क्याप) सिक्किमले राज्यभरि विद्यमान नियम कानुनको धज्जी उडाउँदै व्यापक रूपमा वन फँडानी भएको आरोप लगाउँदै सिक्किम वन विभागका मन्त्री पिंटसो नामग्याल लेपचाको राजीनामा माग गरेको छ। पार्टीका अनुसार जहाँ एकतर्फ सर्वसाधारण जनताले आफ्नो निजी जग्गाको रुख काट्नका लागि समेत सरकारी अनुमति लिनुपर्ने झन्झटिलो व्यवस्था छ, त्यहीँ अर्कोतर्फ राज्यका आरक्षित वनहरूमा ठूलो परिमाणमा रुखहरूको अवैध कटान निरन्तर चलिरहेको छ। यसै आधारमा वन मन्त्रीले आफ्नो नैतिक जिम्मेवारी पूरा गर्न नसकेको ठहर गर्दै पार्टीले उहाँको राजीनामा मागेको हो।
​गान्तोकमा आयोजित एक पत्रकार सम्मेलनलाई सम्बोधन गर्दै पार्टीका प्रवक्ता महेश राईले सिक्किम क्रान्तिकारी मोर्चा (एसकेएम) को सरकार बनेपछि राज्यका सबै जिल्लाका आरक्षित वनहरूमा व्यापक रूपमा रुख काटिएको गम्भीर आरोप लगाउनुभयो। प्रवक्ता राईले एसकेएम सरकारको कार्यकालमा कति रुख काट्ने अनुमति दिइयो र त्यसबाट राज्यको राजस्व खातामा कति रकम जम्मा भयो भन्ने विषयमा वन विभागले कुनै स्पष्ट जवाफ दिन नसकेको दाबी गर्नुभयो। यसका साथै दक्षिण सिक्किमको सदामस्थित एक संरक्षित वन क्षेत्रभित्र लोपोन्मुख प्रजातिको रैथाने ‘चाँप’ को रुखहरू गैरकानुनी रूपमा काटिएको घटनाप्रति कडा आपत्ति जनाउँदै सिटिजन एक्सन पार्टीले यस विषयलाई थप कारबाहीका लागि भारत सरकारको उच्च ओहोदासम्म पुर्‍याउने चेतावनी दिएको छ।