​नयाँ दिल्ली: विश्व साइकल दिवसको अवसरमा केन्द्रीय श्रम तथा रोजगार एवं युवा मामिला र खेलकुद मन्त्री मनसुख माण्डवियाले देशको युवा पुस्तालाई साइकललाई आफ्नो जीवनको अभिन्न अङ्ग बनाउन विशेष अपिल गरेका छन्।
​मन्त्री माण्डवियाले सामाजिक सञ्जाल ‘एक्स’ (ट्विटर) मा एउटा भिडिओ सन्देश साझा गर्दै साइकल चलाउनु कुनै एक दिनको सोख वा व्यायाम मात्र नभएर यो एउटा बलियो र स्वस्थ जीवनशैलीको पहिचान भएको बताएका छन्। उनले भनेका छन्, “साइकलले हामीलाई फिट राख्छ, शरीरलाई ऊर्जावान् बनाउँछ र मानसिक स्वास्थ्यलाई पनि राम्रो बनाउँछ।”
​साइकल यात्रा पर्यावरण संरक्षणको सबैभन्दा सस्तो, राम्रो र दिगो माध्यम भएको चर्चा गर्दै मन्त्री माण्डवियाले यसलाई दैनिक जीवनको हिस्सा बनाउँदा प्रदूषण कम हुने, पेट्रोल–डिजेलको बचत हुने र देशलाई फाइदा पुग्ने उल्लेख गरे। प्रधानमन्त्री नरेन्द्र मोदीको अपिललाई स्मरण गर्दै उनले इन्धनबाट चल्ने सवारी साधनमाथिको निर्भरता कम गर्न साइकल एउटा प्रभावकारी र सकारात्मक समाधान भएको बताएका छन्।
​मन्त्री माण्डवियाले ‘फिट इन्डिया’ अभियान अन्तर्गत सञ्चालित ‘सन्डे अन साइकल’ (आइतवार साइकल यात्रा) कार्यक्रमको प्रशंसा गर्दै देशका लाखौँ युवाहरू यसमा सहभागी भइरहेको जानकारी दिए। आगामी आइतवार देशभरी आयोजना हुने ‘सन्डे अन साइकल’ कार्यक्रम विश्व साइकल दिवसप्रति समर्पित हुने भएकाले सबै युवाहरूलाई ‘फिट इन्डिया एप’ मा दर्ता भई आफ्ना साथीभाइ र परिवारसहित यसमा सहभागी हुन उनले आग्रह गरेका छन्।
​”यस विशेष दिनमा हामी सबैले साइकललाई आफ्नो दिनचर्याको हिस्सा बनाउने र एउटा फिट, स्वस्थ एवं विकसित भारत निर्माणमा योगदान पुर्‍याउने सङ्कल्प गरौँ,” मन्त्री माण्डवियाले भनेका छन्।