दिल्लीमा कूटनीतिक सरगर्मी, भ्रमणलाई भनियो ‘ऐतिहासिक’

​नयाँ दिल्ली: भारतका प्रधानमन्त्री नरेन्द्र मोदी र चार दिने भारत भ्रमणमा रहेका अमेरिकी विदेशमन्त्री मार्को रुबियोबीच शनिबार नयाँ दिल्लीमा उच्च स्तरीय भेटवार्ता भएको छ। दिल्लीमा भएको यस बैठकलाई द्विपक्षीय तथा क्षेत्रीय कूटनीतिक दृष्टिकोणाबाट निकै महत्त्वपूर्ण मानिएको छ।
​चार दिवसीय औपचारिक भ्रमणका लागि भारत आएका विदेशमन्त्री रुबियो कोलकाताका विभिन्न कार्यक्रममा सहभागी भएर सिधै दिल्ली पुगी प्रधानमन्त्री मोदीसँगको छलफलमा जुटेका हुन्। भेटका क्रममा दुई नेताबीच व्यापार, रक्षा, प्रविधि (टेक्नोलोजी) र क्वाड सहयोग जस्ता रणनीतिक मुद्दाहरूमा सघन चर्चा हुने सम्भावना रहेको स्रोतले जनाएको छ।
​भ्रमण सम्बन्ध सुधारका लागि मात्र होइन: राजदूत गोर
भारतका लागि अमेरिकी राजदूत सर्जियो गोरले विदेशमन्त्री रुबियोको यस यात्रालाई “ऐतिहासिक” संज्ञा दिएका छन्। उनका अनुसार यो दौरा दुई देशबीच बिग्रिएको सम्बन्ध सुधार्ने कुनै प्रयास नभएर, भारत र अमेरिकाबीचको स्थापित, मजबुत र भरपर्दो साझेदारीको बलियो प्रतीक हो।
​राजदूत गोरले अमेरिकी राष्ट्रपति डोनाल्ड ट्रम्पले यस भ्रमणलाई निकै गम्भीरताका साथ हेरिरहेको र आगामी क्वाड शिखर सम्मेलनलाई लिएर समेत ह्वाइट हाउस निकै उत्साहित रहेको जानकारी दिएका छन्।
​कोलकातादेखि दिल्लीसम्मको व्यस्त तालिका
शनिबार बिहान भारत आइपुगेका अमेरिकी विदेशमन्त्री रुबियोको तालिका निकै व्यस्त रहेको छ। उनी सुरुमा कोलकाता ओर्लिएका थिए, जहाँ उनले तालतलास्थित मदर हाउस र निर्मला शिशु भवनको भ्रमण गरे। कोलकाताका कार्यक्रमहरू सकेर उनी सिधै नयाँ दिल्लीका लागि प्रस्थान गरेका थिए।
​पश्चिम एसिया संकटका बीच रणनीतिक महत्त्व
पछिल्लो समय पश्चिम एसिया (मिडिल इस्ट) मा चुलिँदै गएको तनाव र संकटका बीच अमेरिकी विदेशमन्त्रीको यो भारत भ्रमणलाई विश्व कूटनीतिमा चासोका साथ हेरिएको छ। भारतले लगातार त्यस क्षेत्रमा शान्ति, संवाद र स्थिरताको वकालत गर्दै आएको छ।
​यसका साथै हर्मुज जलडमरूमध्ये (स्ट्रिट अफ हर्मुज) मा व्यापारिक जहाजहरूको सुरक्षित आवागमन सुनिश्चित हुनुपर्नेमा समेत भारतले जोड दिँदै आएको छ। यस्तो संवेदनशील समयमा भएको यस भेटवार्तालाई भारत–अमेरिका सम्बन्धलाई थप नयाँ उचाइमा पुर्‍याउने दिशामा एउटा कोशेढुङ्गा मानिएको छ।