घरमै भेटियो झुण्डिएको शव, राजनीतिक वृत्त गर्मायो

​कोलकाता: शहरको दक्षिण दमदममा तृणमूल कांग्रेस (टीएमसी) का काउन्सिलर सञ्जय दासको शङ्कास्पद मृत्यु भएको छ। शनिबार बिहान उनको आफ्नै निवासमा फन्दामा झुण्डिएको अवस्थामा शव बरामद भएपछि स्थानीय राजनीतिक माहौल गर्माएको हो।
​प्रहरीको प्रारम्भिक अनुसन्धानले यसलाई आत्महत्या ठाने पनि घटनाको पछाडि अनेकौँ सम्भावित कारणहरू बाहिर आउन थालेका छन्, जसले यस मामिलालाई थप रहस्यमय बनाएको छ। सञ्जय दास स्थानीय राजनीतिमा एक प्रभावशाली अनुहार थिए। उनलाई देवराज चक्रवर्ती र अदिती मुन्सीको निकै नजिकका पात्र मानिन्थ्यो।
​चुनावपछि सञ्जयविरुद्ध लागेका थिए पोस्टहरू
पश्चिम बंगालको हालैको निर्वाचन परिणामपछि उक्त क्षेत्रमा काउन्सिलर सञ्जय दास विरुद्ध श्रृङ्खलाबद्ध पोस्टरहरू लगाइएका थिए। ती पोस्टरहरूमा उनीमाथि अवैध रूपमा जग्गा कब्जा गरेको आरोप लगाउँदै जमिन फिर्ता गर्न माग गरिएको थियो। स्थानीय स्तरमा उनलाई यी मामिलाहरूलाई लिएर लगातार धम्कीहरू समेत दिइएको दाबी गरिएको छ।
​स्रोतका अनुसार पछिल्ला दिनहरूमा उनीसँग मोटो रकमको माग समेत भइरहेको थियो। केही स्थानीय नेताहरूले हालै तृणमूल छोडेर भाजपामा प्रवेश गरेका व्यक्तिहरूबाट उनीमाथि यस्तो दबाब सिर्जना गरिएको आरोप लगाएका छन्। यद्यपि, यी आरोपहरूको आधिकारिक पुष्टि हुन भने बाँकी नै छ।
​गिरफ्तारीको आशंका र मानसिक तनाव
राज्यमा सत्ता परिवर्तन भएपछि विभिन्न नेताहरूमाथि कानुनी कारबाही सुरु भएसँगै सञ्जय दास पनि ठूलो दबाबमा रहेको बताइएको छ। सम्भावित गिरफ्तारी र पुराना फाइलहरू ब्युँतिने आशंकाले उनको मानसिक तनाव बढाएको अनुमान गरिएको छ। स्थानीय बासिन्दाका अनुसार उनी विगत केही समयदेखि गम्भीर डिप्रेसनमा थिए।
​यसका साथै नगर निगमसँग जोडिएका ठेक्कापट्टा र उनको कथित सम्बन्धलाई लिएर पनि चर्चा चुलिएको छ। कतिपयले ती विषयहरू सार्वजनिक हुने डरले उनी मानसिक दबाबमा परेको बताए पनि पार्टीभित्रकै एउटा तप्का भने यो दाबीसँग सहमत छैन।
​शनिबार बिहान शव भेटिएलगत्तै उनलाई अस्पताल पुर्‍याइएको थियो, जहाँ चिकित्सकहरूले उनलाई मृत घोषित गरे। प्रहरीले अप्राकृतिक मृत्युको मुद्दा दर्ता गरी अनुसन्धान सुरु गरिसकेको छ। अब सबैको नजर प्रहरी अनुसन्धानतर्फ सोझिएको छ कि यो केवल आत्महत्या मात्रै हो या यसको पछाडि कुनै ठूलो राजनीतिक वा आर्थिक रहस्य लुकेको छ।