मुम्बई: बलिउडका वरिष्ठ अभिनेता अमिताभ बच्चनलाई लिएर अचानक मनोरञ्जन जगतमा चिन्ता फैलिएको छ। सामाजिक सञ्जालमा एक पत्रकारले अमिताभ अस्वस्थ भएर मुम्बईको लीलावती अस्पतालमा भर्ना भएको दाबी गरेका थिए। यो खबर सार्वजनिक हुनासाथ प्रशंसकहरूबीच चिन्ता बढेको थियो। तर पछि यो चिन्ता हट्यो।अभिनेताका निकट स्रोतहरूले बताएअनुसार अमिताभ बच्चन नियमित स्वास्थ्य जाँचका लागि अस्पताल गएका थिए। जाँच पूरा भएपछि उनी घर फर्किएका थिए।त्यसपछि अभिनेताले स्वयं सामाजिक सञ्जालमार्फत सन्देश साझा गर्दै सबैलाई आश्वस्त पारे। उनले लेखेका छन्, “दाजुभाइहरू, चिल शान्त भएपछि त सुगाहरू बोल्न थाल्छन्।” यसका साथै उनले आफू पूर्ण रूपमा स्वस्थ रहेको स्पष्ट पारे।८३ वर्षीय अमिताभ बच्चनका स्वास्थ्यसम्बन्धी समस्या नयाँ होइनन्। ‘कुली’ चलचित्रको छायाङ्कनका क्रममा गम्भीर रूपमा घाइते भएपछि उनले एक समय मृत्युसँग संघर्ष गर्नुपरेको थियो। पछि भने उनी स्वस्थ भएका थिए।सन् २०१८ मा तीव्र पेट दुखाइपछि चिकित्सकहरूको जाँचमा उनको सानो आन्द्रामा ‘डाइभर्टिकुलाइटिस’ नामक रोग रहेको पत्ता लागेको थियो। शल्यक्रियाका क्रममा उनी कलेजोको गम्भीर रोग सिरोसिसबाट पीडित रहेको पनि खुलेको थियो। चिकित्सकहरूका अनुसार ‘हेपाटाइटिस बी’ का कारण उनलाई यो रोग लागेको हो।हाल उनको कलेजोको केवल २५ प्रतिशत भाग मात्र सक्रिय रहेको छ। हालै लोकप्रिय प्रश्नोत्तरी कार्यक्रमको नयाँ सत्र शुरू हुनुअघि अमिताभले आफ्नो स्वास्थ्य अवस्थाबारे बताउँदै पहिले सजिलै गर्न सकिने सामान्य कामहरू पनि अहिले निकै सावधानीपूर्वक गर्नुपर्ने अवस्था रहेको बताएका थिए।उनले चिकित्सकहरूले आफूलाई उभिएर पाइन्ट नलगाउन सल्लाह दिएको पनि बताए। त्यसपछि पनि अभिनय तथा एक्सन दृश्यप्रतिको उनको समर्पण आजसम्म उस्तै रहेको छ। प्रत्येक दृश्यलाई पूर्ण रूपमा उत्कृष्ट बनाउन उनी आज पनि निरन्तर मेहनत गरिरहेका छन्। यही जिद र समर्पणले उनलाई बलिउडको महानायक बनाएको हो।