​मुम्बई: रितेश देशमुखद्वारा निर्देशित र अभिनित चलचित्र ‘राजा शिवाजी’ ले बक्स अफिसमा आफ्नो विजय यात्रा जारी राख्दै छैटौँ दिन नयाँ रेकर्ड कायम गरेको छ। मराठा साम्राज्यका संस्थापक छत्रपति शिवाजी महाराजको जीवनीमा आधारित यो चलचित्र मराठी सिनेमाको इतिहासमा सबैभन्दा धेरै कमाउने चौथो चलचित्र बनेको छ।
​चलचित्रले छैटौँ दिन ४.२५ करोड भारु कमाउँदै भारतभर कूल ४८.६५ करोड (नेट) संकलन गरेको छ। सलमान खानको केमियो भूमिका रहेको यस चलचित्रले ओपनिङ विकेन्डमा ३३.९० करोड कमाउँदै मराठी सिनेमामा नयाँ कीर्तिमान रचेको थियो। ५२.७० करोडको ग्रस कलेक्सनका साथ यो अहिले ‘सैराट’, ‘बैपन भारी देवा’ र ‘वेद’ पछिको सफल मराठी चलचित्र बनेको छ।
​’भूत बंगला’ र ‘धुरन्धर २’ को शानदार प्रदर्शन:
​अक्षय कुमार र प्रियदर्शनको जोडीको पुनरागमन मानिएको चलचित्र ‘भूत बंगला’ ले प्रदर्शनको २० औँ दिनमा पनि आफ्नो पकड कायम राखेको छ। २०औँ दिन १.७५ करोड कमाउँदै यसले भारतमा कूल १४८.२५ करोड (नेट) संकलन गरेको छ। विश्वव्यापी रूपमा यस चलचित्रले २३२.७८ करोडको व्यापार गरिसकेको छ।
​त्यस्तै, आदित्य धरको चलचित्र ‘धुरन्धर २’ (धुरन्धर: द रिभेन्ज) ले ४९ औँ दिनमा पनि ५२ लाखको कमाइ गर्दै इतिहास रचेको छ। यसले ‘पुष्पा २’ र ‘बाहुबली २’ जस्ता ठूला चलचित्रको रेकर्डलाई पछि पार्दै विश्वभर १७९०.९१ करोड संकलन गरेको छ। यो अहिले आमिर खानको ‘दंगल’ पछि विश्वकै दोस्रो धेरै कमाउने भारतीय चलचित्र बनेको छ।
​जुनैद खानको ‘एक दिन’ असफल:
​अर्कोतर्फ, आमिर खानका छोरा जुनैद खान र साई पल्लवी अभिनित चलचित्र ‘एक दिन’ को अवस्था भने निकै कमजोर देखिएको छ। प्रदर्शनको ६ दिन बितिसक्दा पनि यसले ४ करोडको आँकडा छुन सकेको छैन। छैटौँ दिन यसले मात्र २५ लाख भारु संकलन गरेको छ, जसका कारण यो चलचित्र बक्स अफिसमा फ्लप हुने निश्चित देखिएको छ।