दार्जीलिङ: ​भारतको प्रतिष्ठित इन्जिनियरिङ धरोहरलाई वैश्विक स्तरमा संरक्षित राख्ने उद्देश्यका साथ दार्जीलिङ माउन्टेन रेलवे कोअर्डिनेशन कमिटीको सन् २०२६ को त्रैमासिक बैठक शुक्रबार सम्पन्न भएको छ। दार्जीलिङ हिमालयन रेलवे (डीएचआर) को आतिथ्यमा आयोजित यस बैठकमा आधुनिक रेल सेवा र ऐतिहासिक धरोहर संरक्षणबीच कसरी सन्तुलन कायम राख्ने भन्ने विषयमा विस्तृत छलफल भएको थियो।
​रेलवे बोर्डका एग्जीक्यूटिभ डाइरेक्टर (हेरिटेज) को अध्यक्षतामा सम्पन्न यस उच्चस्तरीय सम्मेलनमा देशका सबै प्रमुख पर्वतीय रेल नेटवर्कका वरिष्ठ अधिकारीहरूको उपस्थिति रहेको थियो। बैठकमा नीलगिरी माउन्टेन रेलवे, कालका-शिमला रेलवे, माथेरान हिल रेलवे र काङ्गड़ा भ्याली रेलवेका प्रतिनिधिहरूले भाग लिँदै पर्वतीय रेलको भविष्य र यसका चुनौतीहरूबारे आ-आफ्नो धारणा साझा गरेका थिए।
​डीएचआरका डाइरेक्टर ऋषभ चौधुरीका अनुसार यस बैठकको मुख्य उद्देश्य हिमाली क्षेत्रमा रेल सञ्चालनसँग जोडिएका समस्याहरूको समाधान खोज्दै एक सशक्त र एकीकृत संरक्षण ढाँचा तयार पार्नु हो। बैठकमा सहभागी अधिकारीहरूले दीर्घकालीन स्थिरताका लागि धरोहरको मौलिकता जोगाउँदै नवीन प्रविधि र समन्वित रणनीतिको प्रयोग आवश्यक रहेको कुरामा जोड दिएका छन्।