​गान्तोक: ​राज्यको रम्फू थाना अन्तर्गत सिङ्गलेबुङ, बागेखोलामा एक स्थानीय व्यक्तिको घरमा चोरी भएको छ। अज्ञात समूहले घरबाट नगदसहित सुनका गहनाहरू लुटेर फरार भएको घटना सार्वजनिक भएको हो।
​प्रहरी रिपोर्टमा उल्लेख गरिएअनुसार अज्ञात आरोपीहरूले पीडितको घरलाई निशाना बनाउँदै ८० हजार रुपैयाँ नगद र सुनका बहुमूल्य गहनाहरू चोरी गरेका छन्। घरमा चोरी भएको थाहा पाएलगत्तै पीडितले सम्बन्धित थानामा पुगेर प्राथमिकी दर्ता गराएका थिए।
​यस सम्बन्धमा प्रहरीले भारतीय न्याय संहिता २०२३ को धारा ३३१ र ३०५ अन्तर्गत मामला दर्ता गरी कानुनी कारबाही अघि बढाएको छ। घटनामा संलग्न फरार आरोपीहरूको पहिचान गर्न र उनीहरूलाई पक्राउ गर्न प्रहरीले सूक्ष्म अनुसन्धान सुरु गरिसकेको जानकारी दिएको छ।