३ अक्टोबर: हिमगिरी युथ क्लब, मंगपूको तत्त्वावधानमा आयोजित सलोनी राई स्मृति नक्आउट फूटबल टुर्नामेण्टमा मानेभञ्ज्यांग एफसी-ले सजिलै जीत हासिल गऱ्यो। शारदा हाई स्कूल नजिक मंगपू डीविजनल ग्राउण्डमा आज खेलिएको दोस्रो राउण्डको दोस्रो म्याचमा मानेभञ्ज्यांग एफसी-ले साइनस ९ मंगपूलाई ६-१-ले पराजित गऱ्यो। विजेता टीमबाट मिंगमा गुरुङ र हाङ्जुक भूटियाले २-२ गोल गरे। यसबाहेक सांगे भूटिया र टकसिर भूटियाले १-१ गोल गरे। यसरी नै साइमन ९ मंगपूको तर्फबाट साइमन लेप्चाले १ गोल गरे। टुर्नामेण्टमा अब केही दिनको ब्रेक रहेको छ। अब १० अक्टोबरको दिन खेलिने म्याचमा गैरीबास युनाईटेड र कालीझोड़ा युवा परिवारमाझ भिड़न्त हुनेछ। यस नाइन ए साइड फूटबल टुर्नामेण्टमा जम्मा २८ वटा टीमले हिस्सा लिएको छ। टुर्नामेण्टमा च्याम्पियन हुने टीमलाई आकर्षक ट्रफीको साथमा १ लाख रुपियाँको नगद पुरस्कार प्रदान गरिनेछ। यसरी नै रनरअप् हुने टीमलाई ट्रफीको साथमा ५० हजार रुपियाँको नगद पुरस्कार प्रदान गरिने आयोजक हिमगिरी युथ क्लबका कार्यकारी सदस्य रोमन आलेले बताएका छन्।