लण्डन: ईंग्ल्याण्डका पूर्व क्रिकेटर रबिन स्मिथको ६२ वर्षको उमेरमा निधन भयो। उनको परिवारले यसको पुष्टि गरेको छ। स्मिथले ईंग्ल्याण्डको निम्ति १९८८-देखि १९९६-बीच ६२ वटा टेस्ट र ७१ वटा वनडे इण्टरनेशनल म्याच खेले। उनी १९९२-मा विश्व कप उपविजेता रहने ईंग्ल्याण्ड टीमका सदस्य थिए। स्मिथले आफ्नो वनडे करियरमा ७१ वटा म्याचमा ३९.०१-को औसतले २४१९ रन बनाए। यसमा ४ वटा शतक र १५ वटा अर्द्धशतक सामेल छ। यस प्रारूपमा उनको सर्वोच्च स्कोर अविजित १६७ रन रह्यो, जुन उनले १९९३-मा अष्ट्रेलियाविरुद्ध बनाएका थिए। यसरी स्मिथले ६२ वटा टेस्टमा ४३.६७-को औसतले ४२३६ रन बनाए। यसमा ९ वटा शतक र २८ वटा अर्द्धशतक सामेल छ। टेस्टमा उनको सर्वोच्च स्कोर १७५ रन रह्यो, जुन उनले १९९४-मा वेष्ट इण्डिजविरुद्ध बनाएका थिए। स्मिथले काउण्टी क्रिकेटमा हेम्पशायरको प्रतिनिधित्व गरेका थिए। उनले २००४-मा क्रिकेटको सबै प्रारूपबाट सन्न्यास लिएका थिए अनि त्यसपछि उनको मानसिक स्वास्थ्य ठीक रहेको थिएन। स्मिथलाई मदपानको पनि लत लागेको थियो। स्मिथले अष्ट्रेलियाविरुद्ध बनाएको अविजित १६७ रन लामो समयसम्म वनडे प्रारूपमा ईंग्ल्याण्डको तर्फबाट कुनै पनि ब्याटरको सर्वोच्च स्कोर रहेको थियो। त्यस रेकर्डलाई २३ सालपछि एलेक्स हेल्सले तोड़ेका थिए। हेल्सले २०१६-मा पाकिस्तानविरुद्ध १७१ रन बनाएका थिए।