जलपाईगढी: उचित तलबको माग गर्दै विरोध प्रदर्शन गरिरहेका किलकोट चिया बगानका मजदुरहरूविरुद्ध गैर-जमानती मुद्दा दर्ता गरिएको छ, जसले गर्दा उनीहरूको आक्रोश झन् बढेको छ। किलकोट चिया बगानका मजदुरहरू धेरै महिनादेखि काम गरिरहेका छन्, तर उनीहरूले समयमै तलब पाएका छैनन्। यो समस्या त्यतिखेर शुरु भयो जब सम्मेलन टी एण्ड बेभरेज लिमिटेडले उक्त चिया बगानको सञ्चालन थालेको थियो। साधारणतया, बगानमा मजदुरहरूको तलब महिनाको ९ र २३ तारिखमा दिने व्यवस्था थियो, तर कहिल्यै समयमै तलब दिइँदैन। विशेषगरी पर्वका समयमा मजदुरहरूको तलब यसरी रोकिन्छ। क्रिसमसअघि किलकोट चिया बगानका मजदुरहरूले कुनै तलब पाएनन्, जबकि अन्य चिया बगानका मजदुरहरूले समयमै तलब पाएका थिए। तलबको माग गर्न मजदुरहरू चिया बगानको गेटमा जम्मा भए, तर सो दिन कार्यालयमा व्यवस्थापक उपस्थित थिएनन्। कार्यालयमा कुनै कर्मचारी पनि थिएन। त्यसैले बाध्य भएर मजदुरहरू व्यवस्थापकको घरमा गएर तलबको माग गरे। समयमै तलब नपाउँदा मजदुरहरूले आफ्नो आक्रोश व्यक्त गरे। पछि पुलिस आएर परिस्थितिलाई नियन्त्रणमा लिए।
२९ दिसम्बरमा मजदुरहरूलाई जानकारी दिइयो कि किलकोट चिया बगानका ६ जना मजदुर र पश्चिम बङ्गाल चिया मजदुर संघका केन्द्रीय समितिका सदस्य किरसेन खेरियाले व्यवस्थापकलाई मार्ने प्रयास गरेको आरोप लागेको छ। तर विडम्बना के हो भने घटनाको दिन किरसेन खेरिया आफ्नो परिवारसँग अन्यत्र रहेको समाचार छ। जस समाचार च्यानलहरूले यो घटना प्रत्यक्ष प्रसारण गरे वा जुन पत्रिकामा यो घटना छापियो, ती कुनै पनि स्थानमा मजदुरहरूले व्यवस्थापकलाई मार्ने प्रयास गरेको भनेर उल्लेख गरिएको छैन। प्रबन्धनले दिएको उजुरीमा मजदुरहरूमाथि धेरै आरोप लगाइएको छl विषय यहाँ समाप्त हुँदैन। किलकोट चिया बगान व्यवस्थापनले मजदुरहरूको तलबबाट पीएफको पैसा नियमित रूपमा काट्छ, तर आजसम्म त्यो पैसा जम्मा गरेको छैन, जुन गैर-जमानती अपराध हो। तर प्रशासन यस विषयमा उदासीन देखिन्छ। हजारौं उजुरी दर्ता हुन्छन्, तर कुनै अनुसन्धान हुँदैन, कसैलाई पक्राउ गरिँदैन। तर निर्दोष मजदुरहरूले समयमै तलबको माग गर्दा वा बाँकी पीएफको रकम माग गर्दा उनीहरूमाथि मुद्दा लगाइन्छ। यस कठोर परिस्थितिमा पश्चिम बङ्गाल चिया मजदुर संघको माग छ कि किरसेन खेरिया र ६ जना मजदुरहरूमाथि लगाइएको झुटा आरोप तत्काल फिर्ता लिनु पर्दछ। किलकोट चिया बगानको व्यवस्थापनविरुद्ध तत्काल छानबिन शुरु गर्नु पर्दछ। किलकोट चिया बगानमा काम गर्ने वातावरण पुनःस्थापना गर्नुपर्छ।
About Author
