मुम्बई: हिन्दी ड्रामा फिल्म ‘सन्तोष’ ओस्कारको सर्टलिस्टमा परेपछि निर्माताहरूले यसलाई भारतका हलहरूमा रिलिज गर्ने घोषणा गरेका छन्। प्रेस नोटअनुसार, शाहाना गोस्वामी अभिनित यो फिल्म आगामी १० जनवरी २०२५ मा भारतभरका थिएटरहरूमा प्रदर्शन हुनेछ। उत्तर भारतको ग्रामीण क्षेत्रको कथामा आधारित यो हिन्दी भाषाको अन्तर्राष्ट्रिय सह-निर्मित फिल्मले ‘बेस्ट इन्टरनेशनल फिचर फिल्म’ विधामा ओस्कार सर्टलिस्टमा स्थान पाएको छ। विशेषगरी, विश्वभरका देशहरूले पेश गरेका ८५ फिल्महरूमध्ये यस श्रेणीमा केवल १५ फिल्म मात्र सर्टलिस्टमा छनोट भएका छन्। ‘सन्तोष’लाई युनाइटेड किंगडमले एकाडेमी अवार्ड २०२५ का लागि आफ्नो आधिकारिक सबमिशनका रूपमा पठाएको थियो। यो फिल्मले ७७औं कान्स फिल्म फेस्टिभल (मई २०२४) मा पनि प्रिमियर गरेको थियो, जहाँ समीक्षकहरूले यसलाई अत्यधिक सकारात्मक प्रतिक्रिया दिएका थिए। यस उपलब्धिमा आफ्नो खुशी व्यक्त गर्दै, शाहानाले आफ्नो इन्स्टाग्राममा लेखेकी छिन्, “हाम्रो फिल्म ‘सन्तोष’ले सर्टलिस्टमा स्थान पाएको यो उपलब्धिका लागि म निकै खुशी छु, विशेषगरी हाम्रा लेखक-निर्देशक सन्ध्या सुरीको लागि। ८५ फिल्महरूमध्ये सर्टलिस्ट हुन पाउनु साँच्चै अविश्वसनीय हो। यस फिल्मलाई माया गर्नु हुने र यसको पक्षमा मतदान गर्ने सबैलाई धेरै धन्यवाद।” सन्ध्या सुरीले निर्देशन गरेको यो फिल्ममा शाहानाले एक युवा हिन्दू विधवाको भूमिका निर्वाह गरेकी छिन्। कथानुसार, उनले आफ्नो पतिको सरकारी जागिर पाएकी हुन्छिन्, जो पुलिस अधिकारी थिए। हलिउड रिपोर्टरका अनुसार, यो फिल्ममा उनले दलित समुदायको एक किशोरीको संलग्नतामा भएको क्रूर हत्याकाण्डको छानबिन गर्ने इन्स्पेक्टर शर्मासँग (सुनीता राजवार) काम गरिरहेकी हुन्छिन्। छानबिनका क्रममा उनी संस्थागत भ्रष्टाचारमा फस्छिन्। ‘सन्तोष’ युनाइटेड किंगडम, भारत, जर्मनी र फ्रान्सको संयुक्त सह-निर्माणमा बनेको छ।