गान्तोक: भारतीय जनता पार्टी (भाजपा) सिक्किमले आज राजधानीको तिब्बत पथस्थित आफ्नो कार्यालयमा विभाजन विभीषिका स्मृति दिवस पालन गऱ्यो। यो दिन १९४७ मा भारत विभाजनको समयमा अनुभव गरिएको गहिरो पीडा र ऐतिहासिक उथलपुथललाई प्रतिबिम्बित गर्न समर्पित रहेको प्रदेश भाजपाले प्रेस विज्ञप्तिमा जनाएको छ।

कार्यक्रममा पार्टीका वरिष्ठ नेतृत्वहरू र कार्यकर्ताहरूको उपस्थिति थियो। कार्यक्रममा विभाजनको समय भएका बलिदान र त्रासदीहरूको स्मरण गर्नुको महत्त्वमाथि चर्चा गरियो। यसैगरी, वर्तमानमा एकता र सद्भाव कायम राख्दै विगतलाई स्वीकार्नुपर्ने आवश्यकतामा जोड दिइयो भने भावपूर्ण श्रद्धाञ्जली र चिन्तनशील छलफल गरिएको थियो।

विज्ञप्तिमा यस दिवसले ऐतिहासिक घटनाहरूको प्रभावको मार्मिक स्मरण गराउॅंछ र त्यसबाट शिक्षा लिनका लागि एकजुट बन्ने महत्त्वलाई उजागर गर्दछ भनी बताएको छ।