दार्जिलिङ: गत २४ जुलाईको दिन भएको स्वास्थ्य जाँच शिविरमा जाँच गरेपछि त्यहाँबाट मणिपाल रेफर गरिएका बिमारीहरू मध्ये १२ जना उपचारको निम्ति कञ्चनजङ्घा ट्रस्ट अनि प्रोजेक्ट रिचिङ आउटको संयुक्त आयोजनामा आज सिक्किम प्रस्थान भएको छ। जाँच शिविरबाट १५० भन्दा धेरै रोगीहरुलाई मणिपाल रेफर गरिएको थियो जसमध्ये ७५ जना तकभर समष्टिबाट रहेको थियो। ती ७५जना मध्ये आज पहिलो चरणमा १२ जनालाई सभासद सूरज राईको पहलमा मणिपाल पठाएको छ भने यसरी नै पालै-पालो तिनीहरू सबैलाई पठाउने कार्य गरिने सभासद सूरज राईले बताएका छन्।

यसवाहेक, अन्य समष्टिको केही रोगीहरु अगावै सिक्किम मणिपाल पुगिसकेका छन्। त्यसमध्ये कतिजना रोगीहरु उपचार गराएर पनि घर फर्की सकेका छन्। उपचार गराएर सीआरएच मणिपालबाट फर्किएका धेरै मानिसहरूले अस्पतालमा भएको उच्च स्तरीय जाँच साथै उपचार अनि हेर चाहको खुल्ला हृदयले प्रशंसा गरिरहेको छ भने अध्यक्ष बिमल गुरुङ, प्रोजेक्ट रिचिङ आउटको निर्देशक बासु राईको मानवीय कार्यप्रति आभार प्रकट गरेका छन्।