बोको: आइतबार  राति आएको विनाशकारी तुफान र असिनापानीले असम-मेघालय सीमामा रहेको बोकोको लम्पी क्षेत्रमा ठूलो क्षति पुर्याएको छ। तुफानले बृहत्तर लम्पी क्षेत्र विशेषगरी ओमसागर, मकाइबारी, हर्षनगर र तल्लो लम्बी क्षेत्रमा १०० भन्दा बढी परिवारका घर ध्वस्त पारेको छ। आँधीका कारण घरमा क्षति पुगेको छ भने दुई जना गम्भीर घाइते भएका छन्। मृत्यु हुनेमा तल्लो लम्पीका भीम रोय र राधिका चुनार रहेका छन्। घाइतेहरूलाई बोको प्राथमिक स्वास्थ्य केन्द्रमा भर्ना गरिएको छ। जिल्ला प्रशासनले हावाहुरीबाट विस्थापित करिब १८० बालबालिका, पुरुष तथा महिलालाई दुईवटा आश्रयस्थलमा राख्ने व्यवस्था गरेको छ। मकाईबारी र तल्लो लुम्पीमा दुईवटा आश्रयस्थल बनाइएको छ। सोमबार बिहान राभा हस्सोङ स्वायत्त परिषदका  महासदस्य अर्जुन छेत्री र राभा हस्सोङ स्वायत्त परिषद्का कार्यकारी सदस्य सुमित राभाले उक्त क्षेत्रमा पुगेर पीडितसँग कुराकानी गरेका थिए। शिविरमा बस्ने र खानाको व्यवस्था बोको राजस्व सर्कल अफिसर दिवाश बोर्दोलोईले लुम्पी गाउँपालिकाका प्रमुख कृष्ण शर्मा र गाउँलेको सहकार्यमा गरेका थिए। यसैबीच, बोको भाजपा मण्डल र कामरुप जिल्ला समितिको टोलीले लम्पीको भ्रमण गरी सहयोगको आश्वासन दिएको छ। रभा हासोङ स्वायत्त परिषदका महासदस्य अर्जुन छेत्रीले विगत ५० वर्षमा लम्पी क्षेत्रमा यस्तो विपद नपाएको बताए।