खरसाङ, ५ फरवरीः खरसाङमा वेष्ट बेंगल नेवार डेवलपमेण्ट कल्चरल बोर्ड र नेवार बुद्धिष्ट कल्याण संगठनको संयुक्त आयोजनमा नेवारी संस्कृति र उत्पादहरूलाई प्रोमोट गर्ने लक्ष्यको साथ आयोजित पहिलो भिमसेन च्यालेञ्ज ट्रफी फूटबल टुर्नामेण्टमा आइतवार दुईवटा प्री-क्वार्टर फाइनल म्याच खेलियो। नयाँ बजार स्थित डब्ल्यूबीएनभीएफ मैदानमा भएको म्याचमा हिल्स फूटबल एकाडमीले जेआर३२ फूटबल एकाडमीलाई २-१-ले पराजित गरी क्वार्टर फाइनलमा स्थान बनायो। यसरी दोस्रो म्याचमा युनाइटेड ब्रदर्स बुरबोंगले गैरीबासलाई ४-३-ले पराजित गऱ्यो। माध्यमिक परीक्षाले गर्दा संशोधित कार्यक्रम अनुसार यस सेभेन ए साइड नक्आउट फूटबल टुर्नामेण्टको दुईवटा सेमिफाइनल १७ र १८ फरवरीमा हुनेछ।

यसरी फाइनल २५ फरवरीमा खेलिनेछ। टुर्नामेण्टमा च्याम्पियन हुने टीमलाई आकर्षक ट्रफीको साथमा १ लाख रुपियाँको नगद पुरस्कार प्रदान गरिनेछ। यसरी रनरअप् हुने टीमलाई आकर्षक ट्रफीको साथमा ५० हजार रुपियाँको नगद पुरस्कार प्रदान गरिनेछ।