नयाँ दिल्ली: भारतमा भइरहेको आईसीसी एकदिवसीय विश्वकप अब समाप्तितर्फ अघि बढेको छ। नयाँ विश्व च्याम्पियनको नाम एक साताभित्र टुंगो लाग्नेछ। आयोजक भारतसँगै दक्षिण अफ्रिका, अष्ट्रेलिया र न्यूजिल्याण्ड सेमिफाइनलमा पुगेका छन्। भारतले न्यूजिल्याण्डसँग खेल्नेछ भने दक्षिण अफ्रिकाले अस्ट्रेलियासँग खेल्नेछ यी चार टोलीका ब्याट्सम्यान रन स्कोरिङका आधारमा शीर्ष ५ मा परेका छन् र सचिन तेन्दुलकरको विश्वकप रेकर्ड तोड्ने दावेदार छन्। विश्वकपको एक सिजनमा सर्वाधिक ६७३ रन बनाउने कीर्तिमान सचिन तेन्दुलकरको नाममा छ। सन् २००३ मा मास्टर ब्लास्टरले १ शतक र ६ अर्धशतकको आधारमा यो अतुलनीय कीर्तिमान बनाएका थिए।
सचिन तेन्दुलकरको एक विश्वकप सिजनमा सबैभन्दा धेरै रन बनाउने कीर्तिमान विगत २० वर्षदेखि अधुरै रहेको छ तर यसपटक आईसीसी एकदिवसीय विश्वकप २०२३ मा अहिलेसम्म देखिएको ब्याटिङ प्रदर्शनका आधारमा टुट्ने पूर्ण आशा छ। विराट कोहली (भारत), क्विन्टन डी कक (दक्षिण अफ्रिका), रचिन रविन्द्र (न्युजिल्याण्ड), रोहित शर्मा (भारत) र डेभिड वार्नर (अष्ट्रेलिया) आईसीसी एकदिवसीय विश्वकपमा सचिन तेन्दुलकरको कीर्तिमान तोड्ने नजिक छन्। यी हुन् यस वर्ष सर्वाधिक रन बनाउने शीर्ष ५ ब्याट्सम्यान। भारतका विराट कोहली सर्वाधिक रन बनाउने खेलाडीको सूचीमा शीर्ष स्थानमा छन्। अहिलेसम्म ९ खेल खेलेर २ शतक र ४ अर्धशतकसहित ५९४ रन बनाएका छन्। दक्षिण अफ्रिकाका क्विन्टन डी ककले ४ शतक प्रहार गर्दै ५९१ रन बनाएका छन्, जुन विराटभन्दा ३ रन कम छ। न्युजिल्याण्डका युवा रचिन रविन्द्रले अहिलेसम्म उत्कृष्ट प्रदर्शन गर्दै ३ शतक र २ अर्धशतकको सहयोगमा कुल ५ सय ६५ रन बनाएका छन्। यो ब्याट्सम्यान पनि सचिन तेन्दुलकरको कीर्तिमान तोड्ने नजिक पुगेका छन्। भारतीय कप्तान रोहित शर्माको नाममा ५०३ रन छन् भने अस्ट्रेलियाका डेभिड वार्नर ४९९ रन बनाएर दौडमा छन्।