​सिलगढी: सिलगढीको प्रधान नगर थाना पुलिसले ९१ लाख रुपियाँभन्दा बढीको साइबर ठगी प्रकरणमा एक निजी बैंकका अर्का कर्मचारीलाई नियन्त्रणमा लिएको छ। यसअघि यही मामलामा सोही बैंकका उप-शाखा प्रबन्धक अनिर्बान सिकदार (३६) लाई पुलिसले पक्राउ गरिसकेको छ।
​पुलिस सूत्र अनुसार, अनिर्बान सिकदारलाई गत शुक्रवार बर्दवान रोडस्थित गोल्डेन प्लाजा भवनमा रहेको निजी बैंकको मुख्य शाखाबाट पक्राउ गरिएको थियो। शनिवार उनलाई सिलगढी अदालतमा पेश गरिएपछि अदालतले तीन दिनको पुलिस हिरासतमा पठाउने आदेश दिएको थियो।
​हिरासतका क्रममा सोधपुछ गर्दा अनिर्बान सिकदारबाट पुलिसले धेरै महत्त्वपूर्ण सुरागहरू प्राप्त गरेको बताइएको छ। सोही जानकारीको आधारमा प्रधान नगर थाना पुलिसले साइबर ठगी सञ्जालमा संलग्न रहेको आरोपमा सोही बैंकका अर्का कर्मचारीलाई नियन्त्रणमा लिएर सोधपुछ गरिरहेको छ। यस ठगी धन्दामा बैंकका अन्य कर्मचारीहरूको संलग्नता छ वा छैन भन्ने विषयमा पनि पुलिसले सूक्ष्म जाँच गरिरहेको छ।
​उल्लेखनीय छ, गत २६ अक्टोबरका दिन प्रधान नगर थाना पुलिसले ‘अपरेसन साइबर प्रहार’ अन्तर्गत ९१ लाख रुपियाँभन्दा बढीको साइबर ठगी प्रकरणमा मनीषा मण्डललाई पक्राउ गरेको थियो।
​अनुसन्धानका क्रममा पुलिसले धेरै नयाँ डिजिटल प्रमाणहरू समेत जफत गरेको छ। पुलिस अधिकारीहरू हाल ठगीको यो ठूलो सञ्जालको पर्दाफास गर्न र यसका मुख्य योजनाकार (मास्टरमाइन्ड) को पहिचान गर्न लागिपरेका छन्।