सोनादा: सोनादा क्षेत्रका चियाबारी श्रमिकका छोरा पहिलोपल्ट भारतीय सेनामा कर्णेल बनेका छन्। सोनादा क्षेत्रका लागि गौरवपूर्ण र ऐतिहासिक उपलब्धि हाँसिल गर्दै रंगमूक चन्द्रमानधूरा (सीएमडी) गाउँका एक साधारण चियाबारी श्रमिकका छोरा विवेक राई भारतीय सेनाको प्रतिष्ठित पद कर्णेल (कर्नल) मा पदोन्नति भई सम्पूर्ण क्षेत्रमा यो दर्जा प्राप्त गर्ने पहिलो व्यक्ति बनेका छन्। सोनादाका चिया बगानदेखि सेनाको नेतृत्वसम्मको उनको यात्रा कठिन परिश्रम, अनुशासन, देशभक्ति र सामुदायिक सहयोगको ज्वलन्त उदाहरण हो।
वर्ष २००३ मा दार्जीलिङस्थित सेन्ट रोबर्ट्स स्कूलबाट बाह्रौं कक्षामा जिल्ला टप गरेर उत्तीर्ण भएपछि विवेक राईले भारतीय सेनामा एक सैनिकका रूपमा आर्मी एभिएसन कर्प्समा हेलिकप्टर प्राविधिकको रुपमा सेवा शुरू गरेका थिए। उनको तेज बुद्धि, कठोर परिश्रम र नेतृत्व क्षमताले २००८ मा उनलाई आर्मी क्याडेट कलेज (ACC) मा छानिन सफल बनायो—जहाँबाट योग्य जवानहरूलाई अधिकृत बन्ने अवसर दिइन्छ।
वर्ष २०१२ मा उनी इण्डियन मिलिटरी एकेडेमी (IMA), देहरादूनबाट लेफ्टिनेन्टका रूपमा अधिकृत बने। पहिलोपटक सीएमडी गाउँमा कमीशंड ऑफिसरको रूपमा उनको आगमनलाई सम्पूर्ण गाउँले खादा, माला र आशीर्वादले स्वागत गरेका थिए। यो क्षण न केवल व्यक्तिगत उपलब्धि थियो। तर सम्पूर्ण क्षेत्रका लागि प्रेरणादायी ऐतिहासिक मोड पनि बनेको थियो। सेनाको आफ्नो उत्कृष्ट सेवाकालमा कर्णेल राईले असाधारण नेतृत्व र समर्पण देखाएका छन्। उनले राष्ट्रिय राइफल्स बटालियनमा कम्पनी कमाण्डरको रूपमा देशको संवेदनशील क्षेत्रहरूमा आतंकविरोधी अपरेसनको नेतृत्व गरे। त्यसपछि एयर डिफेन्स रेजिमेन्टमा ब्याट्री कमाण्डरको रूपमा कार्य गर्दै देशको हवाई सुरक्षामा योगदान पुर्‍याए। वर्ष 2018–19 मा मेजर पदमा रहँदा, उनी इण्डियन मिलिटरी एकेडेमीमा इन्स्टक्टरको रूपमा कार्यरत भए जहाँ उनले भावी सैन्य अधिकृतहरूलाई तालिम दिएका थिए। यस्तो भूमिका केवल उच्च सैन्य चरित्र र नेतृत्व क्षमता भएका अधिकृतहरूलाई दिइन्छ—यो सम्मान उनीप्रति सेनाभित्रको विश्वास दर्शाउँछ। हाल उनी एक इन्फेन्ट्री ब्रिगेडमा सहायक एडजुटेंट जनरल (एएजी) को रूपमा सेवा दिईरहेका छन्। उनको उत्कृष्टता सेनामा प्रवेश गर्नु अघि नै प्रष्ट थियो। सन् २००१ मा सोनादा नालीचौरस्थित सेन्ट प्रटिर्स स्कूलबाट माध्यमिक परीक्षामा टप गरेर उनले मेधावी र अनुशासित विद्यार्थीको पहिचान बनाएका थिए।
उनका पूर्व प्रधानाध्यापक राज सर (राज राई) भन्छन्: “विवेक सधैँ नम्र तर आत्मविश्वासी विद्यार्थी थिए। उनलाई कहिल्यै दबाब दिनु पर्दैनथ्यो। उनको अनुशासन र निष्ठा सानैदेखि देखिन्थ्यो। आज उहाँको सफलता हामी सबैको गौरव हो।”
आफ्नो यात्रा स्मरण गर्दै कर्णेल राईले आफ्ना गाउँ र समुदायप्रति कृतज्ञता व्यक्त गर्नुभयो:“भन्छन् नि, एउटा बच्चा हुर्काउन पूरै गाउँ लाग्छ। मेरो यात्राभर मेरो गाउँलेले कहिल्यै ईर्ष्या गरेनन्, सधैँ मेरो सफलतालाई मभन्दा बढी मनाएका छन्। त्यो सामूहिक खुशी नै मेरो प्रेरणा बन्यो। मेरो सबै उपलब्धि मेरा गाउँलेहरूलाई समर्पित छ, जसले सधैं मलाई साथ दिए।”
पूर्व सांसद तथा सीएमडी गाउँकै निवासी आरबी राईले पनि गहिरो गर्वका साथ भने “उहाँ हाम्रो माटोका सुपुत्र हुन्। विवेक राईले न केवल हाम्रो गाउँको मान बढाएका छन्, तर यहि माटोबाट कस्तो महानता सम्भव हुन्छ भनेर प्रमाणित गर्नुभएको छ। उहाँ हाम्रा युवाहरूका लागि प्रेरणाका स्रोत हुनुहुन्छ।”
कर्णेल पदमा भएको यो पदोन्नति एक व्यक्तिगत सफलता मात्र नभई सम्पूर्ण सोनादा क्षेत्रका चिया बगान समुदायका युवाहरूका लागि आशाको दियो बनेको छ। कर्णेल राईको कथा प्रमाण हो, जहाँबाट यात्रा शुरू भयो त्यहाँ महत्वपूर्ण होइन, तर साहस, परिश्रम, र समुदायको साथ भए सपनाहरू अवश्य पूरा हुन सक्छन्। सीएमडी गाउँ र सम्पूर्ण सोनादा क्षेत्रका लागि कर्णेल राईको यो सफलता गौरवको प्रकाशस्तम्भ बनेको छ, जसले सम्झाउँछ कि विनम्र शुरुवातबाट पनि महानता उदाउन सक्छ र देशप्रेम तथा निष्ठा सधैं सम्मानित हुन्छ।