इनरुवा: सुनसरीको कोशी गाउँपालिका–६, श्रीपुरजब्दीबाट करिब १० लाख रुपैयाँ मूल्य बराबरको अवैध मासु बरामद भएको तीन दिन बितिसक्दा पनि त्यसको वास्तविक मालिक भने अझै खुलेको छैन।
पुलिसले १८ सितम्बर मन्सुरी टोलबाट बेवारिसे अवस्थामा ठूलो परिमाणमा प्याक गरिएको मासु बरामद गरेको हो।
बरामद मासुमा ‘चिकेन सेक कबाब’ ४७१ प्याकेट, ‘चिकेन बर्गर पटिया’ ४०३ प्याकेट, ‘चिकेन नगेट्स’ २०६ प्याकेट, ‘चिकेन फिङ्गर’ ५५४ प्याकेट र ‘चिकेन मेटाबल’ ५२४ प्याकेट रहेका छन्।
पुलिसका अनुसार उक्त मासु भारतबाट अवैध रूपमा नेपाल भित्र्याइएको आशंका गरिएको छ। मासु नेपाली कम्पनीको लेबलमा प्याक गरिएको अवस्थामा फेला परेको प्रहरीले जनाएको छ।
बरामद मासु मानव उपभोगका लागि समेत अयोग्य रहेको पाइएको भन्दै सरोकारवालाको रोहवरमा नष्ट गरिएको छ।
तर ठूलो परिमाणमा मासु बरामद भएको तीन दिन बितिसक्दा पनि यसको मालिक तथा अवैध रूपमा ओसारपसारमा संलग्न व्यक्तिको पहिचान भने हुन सकेको छैन। घटनाबारे प्रहरीले थप अनुसन्धान गरिरहेको जनाएको छ।