​सिलगढी: उत्तर बंगाल भ्रमणका क्रममा मुख्यमन्त्री शुभेन्दु अधिकारी सोमबार सिलगढी आइपुग्ने कार्यक्रम रहेको छ। बागडोगरा विमानस्थलबाट जलपाइगुडीतर्फ जाने क्रममा उहाँले शहरको बहुप्रतिक्षित बर्दवान रोड फ्लाईओभरको उद्घाटन गर्नुहुनेछ। सिलगढी शहरमा हुने सवारी चाप र ट्राफिक जामलाई नियन्त्रण गर्ने उद्देश्यले यो पूर्वाधार परियोजना निर्माण गरिएको हो।
​मुख्यमन्त्रीको भ्रमणलाई ध्यानमा राख्दै जिल्ला प्रशासन र पुलिसले उद्घाटन समारोहको तयारीलाई तीव्र पारेका छन्। कार्यक्रमलाई व्यवस्थित र सुरक्षित रूपमा सम्पन्न गराउनका लागि कार्यक्रम स्थलको सुरक्षा व्यवस्था चुस्त बनाइनुका साथै अधिकारीहरू उच्च सतर्कतामा रहेका छन्।
​सुरक्षा व्यवस्थाको अनुगमन गर्न सिलगढीका पुलिस आयुक्त सैयद वाकार रजाले वरिष्ठ पुलिस अधिकारीहरूसहित फ्लाईओभर क्षेत्रको निरीक्षण गर्नुभयो। निरीक्षणका क्रममा भीआईपीको आवतजावत, ट्राफिक व्यवस्थापन, ब्यारिकेडिङ, सुरक्षाकर्मीको परिचालन तथा मुख्यमन्त्रीको यात्रा मार्गको निगरानीमा विशेष ध्यान दिइएको थियो।
​कार्यक्रम अवधिभर कुनै पनि बाधा-अवरोध नहोस् भन्नका लागि प्रमुख स्थानहरूमा प्रहरी परिचालन गरिनेछ भने आवश्यकता अनुसार ट्राफिक डाइभर्सनको व्यवस्था समेत मिलाइएको छ। सिलगढीको सबैभन्दा व्यस्त सडकखण्डमध्ये एक मानिने यस क्षेत्रमा फ्लाईओभर सञ्चालनमा आएपछि सवारी आवागमन सहज हुने अपेक्षा गरिएको छ। उद्घाटन लगत्तै उक्त फ्लाईओभर सर्वसाधारणका लागि खुला गरिनेछ।