​गान्ताेक: सिक्किमको प्रमुख प्रतिपक्षी दल सिटिजन एक्सन पार्टी (क्याप) ले राज्य सरकारले मितव्ययिता अपनाउने बहानामा आम जनताका लागि ‘लकडाउन’ जस्तो परिस्थिति सिर्जना गरेको आरोप लगाएको छ।
​ग्याङ्टोकमा सोमबार आयोजित पत्रकार सम्मेलनलाई सम्बोधन गर्दै पार्टीका प्रवक्ता अल्बर्ट गुरुङले सत्तारुढ सिक्किम क्रान्तिकारी मोर्चा (एसकेएम) सरकार आर्थिक रूपमा टाट पल्टिएको दाबी गरे। सरकारले आफ्नो वित्तीय कमजोरी र विफलता लुकाउन जनतामाथि विभिन्न किसिमका प्रतिबन्धहरू थुपारेको गुरुङको भनाइ छ।
​प्रवक्ता गुरुङले सिक्किम सरकारले हालै लागू गरेको सवारी साधनको ‘जोर-बिजोर’ प्रणाली स्थापित नियम र कानुनविपरीत रहेको उल्लेख गरे। “सरकारले बिनाकुनै वैज्ञानिक आधार जनतालाई सास्ती दिने गरी यो निर्णय गरेको छ,” उनले भने, “यसले सर्वसाधारणको दैनिक जनजीवन र स्वतन्त्रतामाथि प्रहार गरेको छ।”
​क्यापले सरकारको उक्त निर्णयविरुद्ध कानुनी उपचार खोज्ने घोषणा समेत गरेको छ। प्रवक्ता गुरुङका अनुसार जोर-बिजोर प्रणालीसम्बन्धी सरकारी आदेशलाई चुनौती दिँदै पार्टीले अदालतमा जनहित याचिका (पीआईएल) दायर गर्ने प्रक्रिया अगाडि बढाइसकेको छ।
​सिक्किम सरकारले केही समयअघि आर्थिक भार कम गर्ने भन्दै सरकारी तथा निजी सवारी साधन सञ्चालनमा जोर-बिजोर प्रणालीसहितका विभिन्न नियमहरू घोषणा गरेको थियो। तर, प्रतिपक्षी दलले भने यसलाई सरकारको आर्थिक टाटपल्टाई लुकाउने प्रपञ्च मात्र भएको टिप्पणी गरेको छ।