गान्ताेक: सिक्किम स्पोर्ट्स क्लाइम्बिङ एसोसिएशन ले बिहीबार सिक्किमका मुख्य सचिव आर. तेलाङ सँग भेट गरी राज्यमा प्रस्तावित मेगा स्पोर्ट्स भिलेज तथा एकीकृत सांस्कृतिक–खेल पूर्वाधार परियोजना अन्तर्गत अन्तर्राष्ट्रिय स्तरको स्पोर्ट्स क्लाइम्बिङ सुविधा स्थापना गर्न माग गरेको छ।
एसोसिएशनका अध्यक्ष कुन्जाङ ग्याछो भुटिया को नेतृत्वमा गएको प्रतिनिधिमण्डलमा उपाध्यक्ष प्रवीण खालिङ, महासचिव भाइचुङ योञ्जन तथा अन्य कार्यकारी सदस्यहरू पनि सहभागी थिए। उनीहरूले मुख्य सचिवलाई ज्ञापनपत्र बुझाउँदै सिक्किमका युवामाझ स्पोर्ट्स क्लाइम्बिङप्रति बढ्दो रुचि देखिएको र त्यसका लागि उपयुक्त पूर्वाधार आवश्यक भएको बताएका छन्।
एसोसिएशनले स्पोर्ट्स क्लाइम्बिङ अहिले ओलम्पिक खेलको रूपमा समावेश भइसकेको उल्लेख गर्दै सिक्किममा आधुनिक क्लाइम्बिङ सुविधा विकास गर्नु अत्यन्त महत्वपूर्ण भएको जनाएको छ।
मुख्य सचिव आर. तेलाङ ले प्रतिनिधिमण्डललाई यस प्रस्तावलाई सरकारले सकारात्मक रूपमा विचार गर्ने आश्वासन दिएका छन्।
एसोसिएशनका अनुसार प्रस्तावित सुविधामा ओलम्पिक स्तरका लिड र स्पीड क्लाइम्बिङ वाल, बोल्डरिङ वाल, प्रशिक्षण क्षेत्र तथा प्रतियोगिता सञ्चालनका लागि आवश्यक पूर्वाधार समावेश गरिनेछ। यस्तो सुविधा निर्माण भएमा सिक्किममा राष्ट्रिय तथा अन्तर्राष्ट्रिय प्रतियोगिता आयोजना गर्न सहयोग पुग्ने र युवाहरूलाई खेलतर्फ आकर्षित गर्ने अपेक्षा गरिएको छ।