​पाकिम: पाकिम जिल्लामा सडक सुरक्षालाई थप सुदृढ र व्यवस्थित बनाउने उद्देश्यका साथ जिल्ला सडक सुरक्षा समितिको बैठक सम्पन्न भएको छ। अतिरिक्त जिल्लापाल पुल्कितको अध्यक्षतामा शनिबार अतिरिक्त जिल्लापालको कार्यकक्षमा बैठक सम्पन्न भएको हो।
​पाकिमका पुलिस अधीक्षक छिरिङ शेर्पाको समेत विशेष उपस्थिति रहेको बैठकमा जिल्लाभरिको सडक सुरक्षा, यातायात व्यवस्थापन र दुर्घटना न्यूनीकरणका लागि भइरहेका प्रयासहरूबारे विस्तृत समीक्षा गरिएको थियो।
​बैठकमा यसअघिका निर्णयहरूको कार्यान्वयन अवस्था केलाउँदै दुर्घटनाको बढी जोखिम रहेका क्षेत्र, नियम उल्लङ्घन नियन्त्रण, सडक पूर्वाधार तथा अन्य सुरक्षा चुनौतीबारे गहन छलफल भएको थियो। राष्ट्रिय राजमार्गलगायत प्रमुख सडक खण्डहरूमा सडक सङ्केत (रोड साइन), गति सीमा निर्धारण, सडक रेखाङ्कन तथा आवश्यक सुरक्षा उपायहरू तत्काल सुधार गर्नुपर्नेमा बैठकले जोड दिएको छ।
​सो क्रममा अध्यक्ष पुल्कितले राष्ट्रिय राजमार्गमा पेट्रोल पम्प र सार्वजनिक शौचालयजस्ता अत्यावश्यक सुविधाहरूको जानकारी दिने पर्याप्त सङ्केतहरू राख्न निर्देशन दिएका छन्। साथै, तीव्र मोड तथा अगाडिको दृश्य स्पष्ट नदेखिने जोखिमपूर्ण स्थानहरूमा चालकहरूलाई सचेत गराउने सावधानी सङ्केतहरू राख्नुपर्नेमा उनले विशेष जोड दिए।
​बैठकमा सवारीसाधनका कागजात, प्रदूषण नियन्त्रण, सवारी निरीक्षण प्रक्रिया तथा आधिकारिक निरीक्षण केन्द्रहरूको सञ्चालनबारे पनि छलफल भएको थियो। यसका साथै आपतकालीन उद्धार तथा प्रतिकार्य प्रणाली, आपतकालीन सहायता नम्बरबारे जनचेतना, मालवाहक ट्रकको आवागमन व्यवस्थापन, सडक निगरानी क्यामेराको सञ्चालन, मादक पदार्थ सेवन गरी सवारी चलाउने (मापसे) प्रवृत्ति र अवैध पार्किङ नियन्त्रण गर्ने विषयमा गम्भीर छलफल गरिएको छ।
​यसैगरी, सिक्किम इन्स्पायर्स कार्यक्रमअन्तर्गत पर्यटन प्रवर्द्धन तथा महिलाका लागि जीविकोपार्जनका अवसर सिर्जना गर्ने सम्भावनाबारे पनि विचार-विमर्श गरिएको थियो। समितिका सदस्यहरूले सडकमा सवारीसाधन बिग्रिने समस्या र जोखिमपूर्ण सडक खण्डहरूमा आवश्यक सुरक्षा प्रबन्धको कमीबारे आफ्ना सुझाव र चिन्ता व्यक्त गरेका थिए।
​छलफलपछि अध्यक्षले राष्ट्रिय राजमार्ग तथा पूर्वाधार विकास निगम (एनएचआईडीसीएल) लाई रम्फू-रानीपुल सडक खण्डमा पर्याप्त सडक सङ्केतहरू तुरुन्त राख्न निर्देशन दिएका छन्। साथै, विद्यार्थी तथा पैदल यात्रीहरूको सुरक्षालाई दृष्टिगत गर्दै पाकिमस्थित सेन्ट जेभियर्स विद्यालयको प्रवेशद्वार अगाडि गति अवरोधक (स्पिड ब्रेकर) निर्माण गर्नसमेत कडा निर्देशन जारी गरिएको छ।
​