​हेग: पाँच देशको औपचारिक भ्रमणका क्रममा नेदरल्यान्ड्स पुग्नुभएका भारतीय प्रधानमन्त्री नरेन्द्र मोदीले विश्वसामु नयाँ भारतको बलियो दृष्टिकोण प्रस्तुत गर्नुभएको छ। डच राजधानी हेगमा प्रवासी भारतीय समुदायलाई विशेष सम्बोधन गर्दै उहाँले भारत अब तीव्र आर्थिक विकास गर्ने मुलुक मात्र नभई विश्वकै अर्थतन्त्र र प्रविधिलाई दिशा निर्देश गर्ने ‘ग्लोबल ग्रोथ इन्जिन’ का रूपमा उदाएको दाबी गर्नुभयो।
​प्रधानमन्त्री मोदीले आजको भारतले ठुला लक्ष्यहरू निर्धारण गर्ने र त्यसलाई सफलतापूर्वक हासिल गर्ने क्षमता राख्ने बताउनुभयो। भारतले जी–२० शिखर सम्मेलन र विश्वव्यापी आर्टिफिसियल इन्टेलिजेन्स (एआई) समिट जस्ता महत्त्वपूर्ण अन्तर्राष्ट्रिय कार्यक्रमहरूको सफल आयोजना गरेर आफ्नो बलियो वैश्विक उपस्थितिको पहिचान दिइसकेको उहाँको भनाइ थियो।
​स्टार्टअप र डिजिटल इन्डियाको प्रगतिको चर्चा गर्दै उहाँले भारत विश्वकै तेस्रो ठुलो स्टार्टअप इकोसिस्टम बनेको जानकारी दिनुभयो। यसका साथै संसारकै सबभन्दा ठुलो युनिक आईडी कार्यक्रम, व्यापक वित्तीय समावेशीकरण अभियान र विश्वकै ठुलो सरकारी स्वास्थ्य बिमा योजना भारतमा सफलतापूर्वक सञ्चालन भइरहेको उहाँले उल्लेख गर्नुभयो। अन्तरिक्ष क्षेत्रमा भारतको ऐतिहासिक सफलताको स्मरण गर्दै उहाँले भारत चन्द्रमाको त्यस्तो दुर्गम हिस्सामा पुग्न सफल भएको, जहाँ यसअघि कुनै पनि देश पुग्न नसकेको भन्दै यसले देशको आत्मविश्वास र बढ्दो महत्त्वाकांक्षालाई झल्काउने बताउनुभयो।
​सम्बोधनका क्रममा प्रधानमन्त्री मोदीले सन् २०१४ को लोकसभा निर्वाचनको नतिजा आएको ऐतिहासिक दिनलाई सम्झँदै दशकौँपछि देशले पाएको स्थिर र पूर्ण बहुमतको सरकारले नै विकासलाई नयाँ गति दिएको स्पष्ट पार्नुभयो। उहाँले विभिन्न देशमा छरिएर रहेका प्रवासी भारतीयहरूले आफ्नो कर्मभूमिमा इमानदार योगदान दिँदै आफ्नो पुर्खाको संस्कृति, रैथाने परम्परा र पारिवारिक मूल्य मान्यतालाई जीवन्त राखेकोमा उच्च प्रशंसा गर्नुभयो। भारतको यही सांस्कृतिक विविधता नै संसारभरिको सबभन्दा ठुलो शक्ति भएको उहाँको ठम्याइ थियो।