दुबई: भारतले बंग्लादेशविरुद्ध पहिलो टेस्ट म्याचमा २८० रनले जीतको साथ वर्ल्ड टेस्ट च्याम्पियनशीप (डब्ल्यूटीसी) टेबलमा आफ्नो शीर्ष स्थानलाई अझ सुदृढ़ बनायो। यसरी श्रीलंकाले पनि गाल टेस्टमा न्यूजील्याण्डलाई पराजित गरी आउँदो साल लर्ड्समा हुने फाइनलमा खेल्नको निम्ति आफ्नो दावेदारीलाई मजबूत गऱ्यो। श्रीलंकाले आफ्नो वर्तमान प्रतिद्वन्द्वी न्यूजील्याण्डलाई पछि छोड़ेर तेस्रो स्थान हासिल गरेको छ। चेन्नईमा जीत अनि १२ डब्ल्यूटीसी पोइण्ट्सको साथ भारतले ७१.६७ प्रतिशत पोइण्ट्सको साथ शीर्षमा अष्ट्रेलिया (६२.५० प्रतिशत पोइण्ट्सको साथ दोस्रो स्थानमा)-माथि आफ्नो स्थितिलाई मजबूत बनाएको छ। पाकिस्तानविरुद्ध सीरीज २-०-ले जितेर चौथो स्थानमा पुग्ने बंग्लादेश (३९.२९ प्रतिशत पोइण्ट्स) चेन्नईमा हारपछि झरेर छैटौं स्थानमा पुगेको छ। यसरी गाल टेस्टमा जीतपछि टेबलको तेस्रो स्थानमा पुग्ने श्रीलंकासँग २०२५-मा हुने फाइनलमा स्थान बनाउन गत संस्करणको फाइनलिस्ट भारत र अष्ट्रेलियालाई चुनौती दिने सबैभन्दा असल मौका रहेको छ। गालमा न्यूजील्याण्डविरुद्ध ६३ रनले जीत श्रीलंकाको ८ वटा टेस्टमा चौथो जीत हो। यसरी टीमको ५० प्रतिशत पोइण्ट्स पुगेको छ। श्रीलंकाको टीमले वर्तमान चक्रमा अब अधिकतम ६९.२३ प्रतिशत पोइण्ट्स हासिल गर्न सक्नेछ, जुन आउँदो साल लर्ड्समा हुने फाइनलमा स्थान दिलाउन पर्याप्त हुनेछ। यसको निम्ति टीमले न्यूजील्याण्डलाई दोस्रो टेस्टमा पनि पराजित गर्नु पर्नेछ। त्यसपछि दक्षिण अफ्रिका र अष्ट्रेलियाविरुद्ध पनि सीरीज क्लीन स्वीप गर्नु पर्नेछ। भारतले डब्ल्यूटीसी चक्रमा अझ ९ वटा टेस्ट म्याच खेल्नेछ अनि टीमको नजर लगातार तेस्रोपल्ट डब्ल्यूटीसी फाइनलमा स्थान बनाउनुमा रहेको छ। भारतीय टीम गत दुवै संस्करणको उपविजेता रहेको थियो। भारतले २०२०-को फाइनलमा न्यूजील्याण्ड अनि २०२२-को फाइनलमा अष्ट्रेलियाविरुद्ध हारको सामना गर्नु परेको थियो।