​पाकिम: विश्व मुटु दिवसका अवसरमा सिक्किमको पाकिम जिल्लास्थित रेनोक गणेश मन्दिर परिसरमा नि:शुल्क स्वास्थ्य शिविर तथा सचेतना कार्यक्रम आयोजना गरिएको छ। सिक्किम सरकारको आयुष विभागको निर्देशानुसार रेनोक सामुदायिक स्वास्थ्य केन्द्र (सीएचसी) अन्तर्गतको आयुष क्लिनिक र गैर-सरुवा रोग (एनसीडी) टोलीको संयुक्त आयोजनामा उक्त कार्यक्रम सम्पन्न भएको हो।
​‘डोन्ट मिस अ बीट’ भन्ने विश्वव्यापी नाराका साथ आयोजित कार्यक्रममा मुटुरोगको जोखिम, जीवनशैलीमा सुधार तथा रोकथामका उपायहरूबारे सर्वसाधारणलाई जानकारी गराइएको थियो।
​शिविरमा ६० भन्दा बढी स्थानीय बासिन्दाले नि:शुल्क स्वास्थ्य सेवाको लाभ लिएका छन्। सो अवसरमा रगतमा चिनीको मात्रा (आरबीएस), हेमोग्लोबिन, रक्तचाप परीक्षणका साथै होमियोप्याथिक परामर्श र नि:शुल्क औषधि वितरण गरिएको थियो।
​कार्यक्रममा आयुष क्लिनिकका एमओआईसी डा. ए. जे. खड्काले सन्तुलित आहार, नुन तथा प्रशोधित खानाको प्रयोगमा कमी, नियमित शारीरिक व्यायाम र योगमार्फत तनाव व्यवस्थापन गर्न सकिने विषयमा प्रकाश पारेका थिए। सहभागीहरूलाई जनचेतनामूलक पर्चा तथा शैक्षिक सामग्रीसमेत वितरण गरिएको थियो।
​डा. आश्विन जे. को सुपरिवेक्षणमा सम्पन्न कार्यक्रममा स्वास्थ्यकर्मी, आशा कार्यकर्ता तथा स्थानीय प्रतिनिधिहरूको सहभागिता रहेको थियो। स्थानीय बासिन्दाले गाउँमै पुगेर स्वास्थ्य सेवा उपलब्ध गराएको भन्दै आयुष विभाग र स्वास्थ्य टोलीप्रति आभार प्रकट गरेका छन्।