विकास र प्रकृति संरक्षणलाई सँगसँगै लैजानुपर्नेमा जोड

गान्तोक: भारतकी राष्ट्रपति द्रौपदी मुर्मूले गान्तोकमा आयोजित सिक्किम विश्वविद्यालयको सातौँ दीक्षान्त समारोहमा विशेष सहभागिता जनाएकी छन्। यस गरिमामय अवसरमा सम्बोधन गर्दै राष्ट्रपति मुर्मूले प्राकृतिक सौन्दर्य, अनुपम संस्कृति र जैविक विविधताका लागि सिक्किमले विश्वभर विशिष्ट पहिचान बनाएको उल्लेख गरिन्। उनले हिमालयको सर्वोच्च शिखरमध्ये एक रहेको कञ्चनजङ्घा सिक्किमका लागि प्रकृतिको अमूल्य उपहार भएको बताउँदै यहाँका जनमानसले यसलाई संरक्षक देवताका रूपमा पूज्ने गरेको र उनीहरूमा प्रकृतिको संरक्षण एवं पोषणप्रति अपार जिम्मेवारीको भावना निहित रहेको स्पष्ट पारिन्। सन् २०१६ मा सिक्किम भारतको पहिलो पूर्ण जैविक (अर्गानिक) राज्य बन्नु सम्पूर्ण देशकै लागि गौरवको विषय भएको चर्चा गर्दै उनले विकास र प्रकृतिको संरक्षणलाई सँगसँगै अगाडि बढाउन सकिन्छ भन्ने कुरा सिक्किमले प्रमाणित गरेर देखाएकोमा खुसी व्यक्त गरिन्। प्लास्टिकको प्रयोग घटाउने, जैविक खेतीलाई प्रोत्साहन दिने र पर्यावरणको रक्षा गर्ने जस्ता सिक्किमका प्रयासहरू सम्पूर्ण राष्ट्रका लागि प्रेरणाको स्रोत बन्ने उनको भनाइ थियो। यदि हरेक नागरिकले आफ्नो वरपरको परिवेश, प्रकृति र समाजको स्वच्छताका लागि जिम्मेवारी वहन गर्ने हो भने देशले तीव्र गतिमा प्रगति हासिल गर्न सक्ने उनले दाबी गरिन्।
​सिक्किम अब पूर्ण साक्षर राज्य बनेको ऐतिहासिक उपलब्धिको चर्चा गर्दै राष्ट्रपतिले यसका लागि सिक्किम सरकार र त्यहाँका जनतालाई विशेष बधाई तथा शुभकामना दिइन्। पूर्वोत्तर क्षेत्रको विकास देशको समावेशी प्रगतिका लागि अपरिहार्य रहेको उल्लेख गर्दै उनले यस क्षेत्रका युवाहरूमा अपार प्रतिभा रहेको बताइन्। सिक्किमसहित अन्य विभिन्न राज्यबाट आएका सिक्किम विश्वविद्यालयका विद्यार्थीहरूलाई राष्ट्र विकासमा योगदान पुर्‍याउने सामूहिक भावनाका साथ अघि बढ्न र एकापसमा जोडिएर रहन उनले आग्रह गरिन्। युवाहरूले आफ्नो क्षमता र समर्पणको माध्यमबाट समाजको सीमान्तकृत (पिछडिएको) वर्गको जीवनस्तरमा सुधार ल्याई समावेशी विकासलाई बढावा दिन महत्त्वपूर्ण भूमिका खेल्न सक्ने उनले उल्लेख गरिन्। शिक्षा र अनुसन्धानको केन्द्र हुनुका साथै सिक्किम विश्वविद्यालयसँग यस क्षेत्रको भाषा, संस्कृति र पर्यावरणको संरक्षण गर्ने विशेष दायित्व रहेको बताउँदै विश्वविद्यालयले आधुनिक शिक्षालाई स्थानीय परम्परा, पर्यावरणीय जागरूकता र सामाजिक उत्तरदायित्वसँग एकीकृत गरिरहेकोमा उनले हर्ष व्यक्त गरिन्।
​शिक्षा आत्मनिर्भरताको निम्ति सबैभन्दा महत्त्वपूर्ण औजार भएको उल्लेख गर्दै राष्ट्रपति मुर्मूले विद्यार्थीहरूलाई शिक्षाद्वारा सशक्त बन्दै राष्ट्र र समाजको समुत्थानका लागि काम गर्न आह्वान गरिन्। उनले विद्यार्थीहरूलाई आफ्नो क्षमतामाथि पूर्ण विश्वास राख्न, अरूको ज्ञान र अनुभवबाट सिक्न तथा एक्लै नभएर सहकार्यका माध्यमबाट प्रगति हासिल गर्न सल्लाह दिइन्। देशले सन् २०४७ सम्ममा विकसित भारत बन्ने लक्ष्य लिएर अघि बढिरहेको सन्दर्भ जोड्दै विद्यार्थीहरूले आ-आफ्नो क्षेत्रमा कुशलता, समानता र वहनीयताको मूल्य-मान्यतालाई आत्मसात गर्दै अघि बढ्ने विश्वास उनले व्यक्त गरिन्। यस दीक्षान्त समारोहमा सहभागी हुनुअघि राष्ट्रपति मुर्मूले गान्तोकमा महिलाहरूका लागि ‘पिङ्क बस’ र ठोस फोहोर व्यवस्थापनका लागि ‘संसाधन बहाली वाहन’ लाई हरियो झण्डा देखाएर शुभारम्भ गरेकी थिइन्।