प्रधानमन्त्री मोदी र प्रधानन्यायाधीश सूर्यकान्तसहित विशिष्ट व्यक्तित्वको सहभागिता
​
नयाँ दिल्ली: भारतको ८०औँ स्वतन्त्रता दिवसका अवसरमा राष्ट्रपति भवनमा शनिवार परम्परागत ‘एट होम’ जलपान समारोह (रिसेप्शन) आयोजना गरिएको छ। राष्ट्रपति द्रौपदी मुर्मूद्वारा आयोजित उक्त औपचारिक समारोहमा देशका शीर्ष राजनीतिक नेतृत्व, कूटनीतिज्ञ र समाजका विभिन्न क्षेत्रका विशिष्ट व्यक्तित्वहरूको बाक्लो उपस्थिति रहेको थियो।

​’वंदे मातरम’ र राष्ट्रिय गानको धुनसँगै शुभारम्भ भएको समारोहमा उपराष्ट्रपति सीपी राधाकृष्णन, प्रधानमन्त्री नरेन्द्र मोदी, पूर्वराष्ट्रपति रामनाथ कोविन्द र पूर्वउपराष्ट्रपति एम. वेन्कैया नायडू सहभागी थिए। त्यसैगरी, भारतका प्रधानन्यायाधीश (सीजेआई) सूर्यकान्त, लोकसभा अध्यक्ष ओम बिरला, रक्षामन्त्री राजनाथ सिंह, वैदेशिक मामिला मन्त्री एस. जयशंकर र केन्द्रीय मन्त्री अश्विनी वैष्णवको पनि उपस्थिति थियो। समारोहमा प्यारा-क्रिकेटर आमिर हुसेन लोनलगायत खेल, कला, साहित्य र सामाजिक क्षेत्रका प्रतिनिधिहरू अतिथिका रूपमा उपस्थित थिए।
​यसअघि, राष्ट्रपति मुर्मूले राष्ट्रिय युद्ध स्मारक पुगेर सहिदहरूप्रति श्रद्धाञ्जली अर्पण गरेकी थिइन्। चीफ अफ डिफेन्स स्टाफ (सीडीएस) जनरल एनएस राजा सुब्रमणि, थलसेना प्रमुख जनरल धीरज सेठ, नौसेना प्रमुख एडमिरल कृष्णा स्वामीनाथन र वायुसेना प्रमुख एयर चीफ मार्शल एपी सिंहले पनि स्मारकमा पुष्पगुच्छा अर्पण गरेका थिए।
​यसैबीच, लाल किल्लाको प्राचीरबाट देशलाई सम्बोधन गर्दै प्रधानमन्त्री मोदीले यसपटक स्वतन्त्रता दिवसको समारोहमा ‘वंदे मातरम’ को गायन ऐतिहासिक बनेको बताएका छन्। उनले ‘हरेक दिलमा वंदे मातरम र हरेक घरमा तिरंगा’ रहेको उल्लेख गर्दै देशभक्तिको लहर देशभर फैलिएको धारणा राखेका थिए।