​गान्तोक: सिक्किमको सत्तारुढ दल सिक्किम क्रान्तिकारी मोर्चा (एसकेएम) ले राज्यका नौवटा सहरी स्थानीय निकायका लागि पदाधिकारीहरूको घोषणा गरेको छ। बिहीबार राजधानीमा आयोजित पत्रकार सम्मेलनमा गान्तोक नगर निगम (जीएमसी) को मेयरमा निवर्तमान उप-मेयर छिरिङ पाल्देन भोटिया र उप-मेयरमा सारा लामालाई नियुक्त गरिएको घोषणा गरियो।
​पार्टीका महासचिव एवं मन्त्री अरुण उप्रेतीले निर्वाचित पार्षदहरूको सहमति र पार्टी अध्यक्ष पीएस गोलेको अध्यक्षतामा बसेको बैठकको निर्णयानुसार यी नियुक्तिहरू गरिएको जानकारी दिए। यसअघि जीएमसीको मेयर पदमा नील बहादुर छेत्री कार्यरत थिए।
​एसकेएमले एक नगर निगमसहित एक नगर परिषद् र सातवटा नगर पञ्चायतका प्रमुख तथा उप-प्रमुखहरूको नाम सार्वजनिक गरेको छ। जसअनुसार नाम्ची नगर परिषद्को चेयरमेनमा गणेश राई र भाइस चेयरमेनमा सरस्वती शर्मा नियुक्त भएका छन्। नयाँ बजार जोरथाङ नगर पञ्चायतको सभापतिमा साम्तेन मोक्तान तामाङ र उप-सभापतिमा मञ्जरी राईलाई जिम्मेवारी दिइएको छ।
​त्यसैगरी, गेजिङ नगर पञ्चायतको सभापतिमा खिनामाया तिवारी र उप-सभापतिमा रिन्जिङ भोटिया चयन भएका छन्। सोरेङ नगर पञ्चायतको नेतृत्व दिना हाङ्गमा सुब्बा र दिल प्रसाद जोगीले सम्हाल्नेछन् भने मङ्गन नगर पञ्चायतको सभापतिमा छिरिङ डोमा भोटिया र उप-सभापतिमा नर्बु रिन्छेन लेप्चा नियुक्त भएका छन्। रम्फू नगर पञ्चायतको सभापतिमा सन्जित कुमार खाती र उप-सभापतिमा सन्जु मंगरलाई तोकिएको छ।
​सिङताम नगर पञ्चायतको सभापतिमा मुकेश अग्रवाल र उप-सभापतिमा बिन्ध्या सुब्बा तथा पाकिम नगर पञ्चायतको सभापतिमा इन्चुङ भोटिया र उप-सभापतिमा भीममाया छेत्री नियुक्त भएका छन्। एसकेएम प्रवक्ता जेकब खालिङका अनुसार पार्टीका सबै ६२ जना निर्वाचित पार्षद र सम्बन्धित क्षेत्रका विधायकहरूको उपस्थितिमा सर्वसम्मत रूपमा यो निर्णय लिइएको हो। स्थानीय तहको निर्वाचन सम्पन्न भएसँगै नेतृत्व चयनको प्रक्रिया टुङ्गिएको छ।