जयपुर: गुजरात टाइटन्सले आईपीएल २०२६-को ५२औं म्याचमा राजस्थान रोयल्सलाई सजिलै ७७ रनले पराजित गऱ्यो। यो गुजरात टाइटन्सको लगातार चौथो जीत अनि राजस्थान रोयल्सको लगातार दोस्रो हार हो। यस जीतको साथ गुजरात टाइटन्स ११ वटा म्याचमा १४ पोइण्ट्सको साथ नेट रन रेटको आधारमा आईपीएल पोइण्ट्स टेबलको दोस्रो स्थानमा पुग्यो। यसरी नेट रन रेटकै आधारमा पाँचौं स्थानमा रहने राजस्थानसँग १२ पोइण्ट्स रहेको छ। सवाई मानसिंह स्टेडियममा टस हारेर पहिला ब्याटिंग गर्दै गुजरात टाइटन्सले २० ओभरमा ४ विकेट गुमाएर २२९ रन बनायो। जवाफमा राजस्थान रोयल्सको टीम १६.३ ओभरमा केवल १५२ रन बनाएर अलआउट भयो। म्याचमा पहिला ब्याटिंग गर्दै गुजरात टाइटन्सको तर्फबाट कप्तान शुभमन गिलले ४४ बलमा सर्वाधिक ८४ रन बनाए। उनले ९ वटा चौका र ३ वटा छक्का लगाए। यसबाहेक साई सुदर्शनले ६ वटा चौका र २ वटा छक्काको सहायताले ३६ बलमा ५५ रन बनाए। गिल र सुदर्शनले पहिलो विकेटको निम्ति ६५ बलमा ११८ रनको पार्टनरशीप गरी टीमलाई असल शुरुवात दिलाए। यी दुईजना आउट भएपछि वाशिंगटन सुन्दरले ३७ रन बनाएर टीमलाई विशाल स्कोरसम्म पुऱ्याए। उनले २० बलको सामना गरी ३ वटा छक्का र २ वटा चौका लगाए। जोस बटलरले १३ र राहुल तेवतियाले अविजित १४ रन बनाए। राजस्थानका बलरहरूमा ब्रिजेश शर्माले सर्वाधिक २ विकेट लिए। त्यसपछि २३० रनको लक्ष्यलाई पीछा गर्दै यशस्वी जयसवालले टीमलाई तेज शुरुवात दिलाए पनि अन्य कसैले क्रीजमा समय बिताएर लामो ईनिंग्स खेल्न सकेनन्। रविन्द्र जडेजाले सर्वाधिक ३८ रन बनाए। उनले २५ बल खेलेर ३ वटा चौका र २ वटा छक्का लगाए। यसरी सूर्यवंशीले ३ वटा छक्का र ३ वटा चौकाको सहायताले १६ बलमा ३६ रन बनाए। ध्रुव जुरेलले २४ रनको योगदान दिए। उनले १० बल खेलेर ३ वटा छक्का र एउटा चौका लगाए। कार्यवाहक कप्तान यशस्वी जयसवाल ३, सिमरोन हेटमायर ६ र डोनोभन परेरा ४ रन बनाएर आउट भए। गुजरातका बलरहरूमा राशिद खानले सर्वाधिक ४ विकेट लिए। यसरी जेसन होल्डरको खातामा ३ विकेट रह्यो।