​पटना: रक्षाबन्धनको अवसरमा बिहारका छोरी र महिलाहरूको सम्मान, सुरक्षा तथा सशक्तिकरणका लागि मुख्यमन्त्री सम्राट चौधरीले तीन नयाँ योजनाको घोषणा गरेका छन्। मुख्यमन्त्रीले सामाजिक सञ्जाल मार्फत यी कल्याणकारी योजनाहरूको सार्वजनिक जानकारी गराएका हुन्।
​छात्राहरूको सुरक्षालाई प्राथमिकता दिँदै सरकारले ‘पुलिस दिदी (अभया बिग्रेड)’ अन्तर्गत ४,७०० वटा स्कुटर तथा मोटरसाइकल परिचालन गर्ने भएको छ, जसले स्कुल तथा कलेज आसपासका क्षेत्रमा कडा निगरानी राख्नेछ। उच्च शिक्षा र अनुसन्धानलाई प्रवर्द्धन गर्न सुरु गरिएको ‘मुख्यमन्त्री बालिका पीएचडी फेलोसिप’ मार्फत करिब १,००० योग्य छात्राहरूलाई चार वर्षसम्म प्रतिमहिना १०,००० रुपैयाँ आर्थिक सहायता प्रदान गरिनेछ। यसका साथै, महिलाहरूलाई उद्यमशीलतासँग जोड्दै आत्मनिर्भर बनाउन ‘बिहारकी बेटी स्टार्टअप च्यालेन्ज योजना’ ल्याइएको छ, जसअन्तर्गत ५० हजारदेखि २ लाख रुपैयाँसम्मको वित्तीय सहयोग उपलब्ध गराइनेछ।
​महिलाको उन्नति नै बिहारको प्रगति भएको उल्लेख गर्दै मुख्यमन्त्री चौधरीले प्रदेश सरकार छोरीहरूको सुरक्षा, शिक्षा र आत्मनिर्भरताका लागि निरन्तर प्रतिबद्ध रहेको बताएका छन्।